«Iandeks.Taksı» men taksıshilerdiń eldi qalaı aldaıtyny anyqtaldy

Jan-jaqtan qysym kórgen taksıshiler qandaı qýlyqqa basqanyn áńgimelep, aldaý shemalarynan saqtandyrdy,-dep habarlaıdy Qandastar.kz

Ulttyq statıstıka bıýrosynyń dereginshe, Qazaqstanda taksı qyzmetiniń tarıfi taǵy qymbattady. 2024 jyldyń mamyr aıynyń qorytyndysynda onyń baǵasy 11,7% ósti.

О́tken aıda bul sektordaǵy eń salmaqty qymbatshylyq Almaty turǵyndaryna soqqy boldy: birden 31,3%-ǵa kóterildi. Aqtóbede de taksı baǵasy 22,1% ulǵaıyp, qoljetimsiz bola tústi. Batys Qazaqstan oblysynda taksımen jetý «sán-saltanatqa» aınala bastaǵandaı: tarıfi 21,3% joǵarylady.

Taksı qyzmeti qatty qymbattaǵan óńirlerdiń bestigine sondaı-aq Shymkent (16,9%-ǵa) jáne Aqmola oblysy (13,5%-ǵa) kirdi. О́zge barlyq óńirde baǵa ósken.

Nátıjesinde, Numbeo portalynyń dereginshe, búkil TMD elderi ishinde Qazaqstan – taksı tarıfi eń joǵary elge aınaldy. Salystyrsaq, Armenııada taksımen júrý asa arzan: 1 shaqyrym jol orta eseppen 0,28 dollarǵa (nemese 130 teńgege) túsedi. О́zbekstanda – 0,29 dollar, Ýkraınada – 0,3 dollar, Belarýste – 0,31 dollar, Reseıde – 0,34 dollar, Ázerbaıjanda – 0,59 dollar, Qazaqstanda – 0,67 dollar.

Energyprom monıtorıng agenttiginiń dereginshe, 2024 jylǵy qańtar-sáýirde taksı elimizde 21,2 mıllıon jolaýshyny tasyǵan eken. Bul bir jyl burynǵy kórsetkishten 8,6% kóp.

Taksımen jolaýshy tasıtyn kompanııalar bıylǵy tórt aıda 2,8 mıllıard teńge tabys tapqan. Salystyrsaq, byltyrǵy uqsas kezeńdegi tabysy 1,8 mlrd teńge ǵana bolǵan. Tabysy kól-kósir: 53,8%-ǵa ósipti. Buǵan olar tarıfterin qymbattatý arqyly qol jetkizýi múmkin.

Aıta ketetin jaıt, «Iandeks.Taksı», inDriver sııaqty taksı agregatorlarynyń urandary birdeı: «jol aqysyn jolaýshy belgileıdi». Bir qaraǵanda, ádiletti: qaltańyzda qansha qarjy bolsa, nemese jolaqysyn qalaı baǵalasańyz, sonsha ǵana shyǵyn shyǵarasyz.

Biraq shynynda olaı emes. Mysaly, bas qalanyń kóshesinde, jol boıynda qol bulǵap, júrgizýshimen kelisip, bes júz teńgege jetip qalýǵa da bolady. Taksı servısinde de klıent 500 teńge baǵa belgileı alady. Alaıda oǵan kelisetin taksıshini tabý muń. Bir saǵat kútseńiz de, birde bir taksıshi ún qatpaýy múmkin.

«Sol bes júzge de tasyr edik, biraq bizdiń tapqanymyzdyń úlken bóligin «Iandeks.Taksı», Indraıver alyp qoıady. Men mysaly, ekeýinde qyzmet kórsetemin. Jamany sol, servıs jeke kóligimen jolaýshy tasyp, tabys tapqysy keletin jeke adamdardyń bárin áldebir taksoparkterge tirkeıdi. Talaby sondaı. Biraq men ol taksoparktiń qyzmetkeri emespin, onyń ókilderimen ómiri kezdesken emespin, soǵan qaramastan, meniń kúni boıy zyr júgirip tapqan barlyq tabysymnyń 4 paıyzyn taksopark alyp qoıady. Olardyń artynda myqty tiregi barlar, yqpaldy tulǵalar tur deıdi, Úkimettiń de tisi batpaǵan. Sodan ol deldaldar taksısterge esh kómek kórsetpeı, jolaı teginen tegin komıssııasyn qyrqyp alýda», – dep ashynady taksıshi Vadım Bajenın (tegi ózgertildi).

Onyń aıtýynsha, jan-jaqtan (agregatordan, taksoparkten jáne jolaýshylardan – sapar úshin nashar baǵa qoıatyndar jáne shaǵymdanatyndar kóbeıgen) qysym kórgen keıbir taksıshiler alaıaqtyqqa bara bastapty.

Mysaly, «FakeGPS» sııaqty arnaıy baǵdarlamalar qoıady: ol mashınanyń koordınattaryn aýystyrady. Agregator kóliktiń qaltaly azamattar turatyn shaǵynaýdanda aıaldaǵanyn kórip, tapsyrysty da soǵan usynady. Shyn máninde, bul kezde taksıst basqa kóshede kele jatýy nemese ashanada tústenip otyrýy múmkin.

Nemese júrgizýshi klıent shaqyrǵan mekenjaıǵa jetpese de, «kútip turǵanyn» kórsetedi. Sóıtip, tegin kútý ýaqyty qysqarady. Jolaýshy tez jınalyp, mashınaǵa jetip úlgermeıdi. Nátıjesinde, taksıshi aqyly kútý úshin jolaýshydan kóbirek aqsha alady.

Jolaýshylarmen ymyralasyp, agregatordy aldaıtyn taksıshiler de tabylady eken: klıent túrli sebeppen tapsyrysynan bas tartady, biraq shynynda shaqyrǵan taksıimen kózdegen jerine jetip qalady jáne jolaqysyn júrgizýshige qolma-qol tóleıdi.