«ىدىس جۋعا ەرىنىپ, بالالاردى ءبىر قاسىقپەن تاماقتاندىرعان»: ماڭعىستاۋدا تاربيەشى جۇمىستان كەتتى

فوتو:istockphoto.com

ماڭعىستاۋ وبلىسى, مۇنايلى اۋدانىنداعى جەكە بالاباقشالاردىڭ بىرىندە 8 بالا ەكى ىدىستان ءبىر قاسىقپەن تاماقتانعانى تۋرالى بەينەجازبا اتا-انالاردىڭ اشۋىن تۋعىزدى, دەپ جازدى  qandastar.kz   Todayinfo اقپارات اگەنتتىگىنە سىلتەمە جاساپ.

وقيعاعا قاتىستى زارداپ شەككەن قىزدىڭ اناسى ەسىمىن جاسىرىن قالدىرۋدى سۇرادى. ونىڭ ايتۋىنشا, بالاسىنىڭ قولى كوگەرىپ, جاراقاتتانعانىن كەشكىسىن اكەسى بايقاپ قالعان. كەيىن اتا-اناسى بالاباقشاداعى بەينەباقىلاۋ جازباسىن قاراپ, تاربيەشىنىڭ ءبۇلدىرشىندى قولىنان جۇلقىپ, كۇش قولدانعانىن انىقتاعان.

كامەرا جازباسىندا تاربيەشىنىڭ ءبىر داستارقان باسىندا وتىرعان 8 بالاعا ءبىر عانا قاسىقپەن تاماق بەرگەنى كورىنەدى.

«الدارىنا ەكى سورپا ىدىسى قويىلعان. ال تاربيەشىسى جالاڭ قولمەن ناندى تۋراپ, سول ىدىسقا سالىپ بەرەدى. بەرگەندە دە جەكە-جەكە ەمەس, ءبىر قاسىقپەن 8 بالانى بىردەن تاماقتاندىرادى», – دەلىنگەن حابارلامادا.

جەكە بالاباقشا ديرەكتورى راۋشان اياپبەرگەنوۆا بۇل وقيعاعا قاتىستى پىكىر ءبىلدىردى. ونىڭ ايتۋىنشا, تاربيەشى ىدىس جۋدان قاشىپ, جۇمىسىن جەڭىلدەتۋ ءۇشىن وسىنداي ارەكەتكە بارعان.

«سول كۇنى مەن جۇمىستا بولمادىم, جىلدىڭ باسى بولعان سوڭ بالاباقشاعا وزگەرىستەر ەنگىزەيىن دەپ شارۋالارمەن سىرتقا شىقتىم. نەگىزى بالا سانىنا ساي ىدىستار جەتكىلىكتى, تاماق تا از ەمەس», – دەدى ديرەكتور.

ال مۇنايلى اۋداندىق ءبىلىم ءبولىمىنىڭ باسشىسى باتىربەك دەموكرات ۇلى بۇل جايتقا بايلانىستى تاربيەشىگە ارنايى ايىپپۇل سالىنعانىن مالىمدەدى. سونىمەن قاتار, قۇزىرلى ورگاندارعا ءتيىستى شارا قولدانۋ جونىندە حات جولدانعان. قازىرگى تاڭدا ءبۇلدىرشىن باسقا بالاباقشاعا اۋىستىرىلعان.

بۇل جاعداي قوعامدا بالاباقشالارداعى سانيتارلىق تالاپتاردىڭ ساقتالۋى مەن بالا قاۋىپسىزدىگىنە قاتىستى الاڭداۋشىلىقتى كۇشەيتتى. اتا-انالار مەكتەپكە دەيىنگى مەكەمەلەرگە باقىلاۋدى كۇشەيتۋ قاجەتتىگىن تالاپ ەتۋدە.