«Ydys jýýǵa erinip, balalardy bir qasyqpen tamaqtandyrǵan»: Mańǵystaýda tárbıeshi jumystan ketti

Foto:istockphoto.com

Mańǵystaý oblysy, Munaıly aýdanyndaǵy jeke balabaqshalardyń birinde 8 bala eki ydystan bir qasyqpen tamaqtanǵany týraly beınejazba ata-analardyń ashýyn týǵyzdy, dep jazdy  qandastar.kz   Todayinfo aqparat agenttigine silteme jasap.

Oqıǵaǵa qatysty zardap shekken qyzdyń anasy esimin jasyryn qaldyrýdy surady. Onyń aıtýynsha, balasynyń qoly kógerip, jaraqattanǵanyn keshkisin ákesi baıqap qalǵan. Keıin ata-anasy balabaqshadaǵy beınebaqylaý jazbasyn qarap, tárbıeshiniń búldirshindi qolynan julqyp, kúsh qoldanǵanyn anyqtaǵan.

Kamera jazbasynda tárbıeshiniń bir dastarqan basynda otyrǵan 8 balaǵa bir ǵana qasyqpen tamaq bergeni kórinedi.

«Aldaryna eki sorpa ydysy qoıylǵan. Al tárbıeshisi jalań qolmen nandy týrap, sol ydysqa salyp beredi. Bergende de jeke-jeke emes, bir qasyqpen 8 balany birden tamaqtandyrady», – delingen habarlamada.

Jeke balabaqsha dırektory Raýshan Aıapbergenova bul oqıǵaǵa qatysty pikir bildirdi. Onyń aıtýynsha, tárbıeshi ydys jýýdan qashyp, jumysyn jeńildetý úshin osyndaı áreketke barǵan.

«Sol kúni men jumysta bolmadym, jyldyń basy bolǵan soń balabaqshaǵa ózgerister engizeıin dep sharýalarmen syrtqa shyqtym. Negizi bala sanyna saı ydystar jetkilikti, tamaq ta az emes», – dedi dırektor.

Al Munaıly aýdandyq bilim bóliminiń basshysy Batyrbek Demokratuly bul jaıtqa baılanysty tárbıeshige arnaıy aıyppul salynǵanyn málimdedi. Sonymen qatar, quzyrly organdarǵa tıisti shara qoldaný jóninde hat joldanǵan. Qazirgi tańda búldirshin basqa balabaqshaǵa aýystyrylǵan.

Bul jaǵdaı qoǵamda balabaqshalardaǵy sanıtarlyq talaptardyń saqtalýy men bala qaýipsizdigine qatysty alańdaýshylyqty kúsheıtti. Ata-analar mektepke deıingi mekemelerge baqylaýdy kúsheıtý qajettigin talap etýde.