جاڭالىقتار
زاڭ جوباسى ماجىلىستە: رەسەي قازاقستاندا جىلۋ ەلەكتر ورتالىقتارىن سالۋى مۇمكىن
فوتو: اشىق دەرەككوز
پارلامەنت ءماجىلىسىنىڭ قاراۋىنا «قازاقستان ۇكىمەتى مەن رەسەي ۇكىمەتى اراسىنداعى قازاقستان رەسپۋبليكاسىنىڭ اۋماعىندا كوكشەتاۋ, سەمەي جانە وسكەمەن قالالارىندا كومىر جاعاتىن جىلۋ ەلەكتر ورتالىقتارىن سالۋ جوبالارى تۋرالى كەلىسىمدى راتيفيكاتسيالاۋ تۋرالى» زاڭ جوباسى كەلىپ ءتۇستى, دەپ جازدى qandastar.kz
كەلىسىم قازاقستان مەن رەسەي اراسىنداعى ەنەرگەتيكالىق ىنتىماقتاستىقتى نىعايتۋعا باعىتتالعان. ول اتالعان قالالاردا جاڭا جىلۋ ەلەكتر ورتالىقتارىن جوبالاۋ, قۇرىلىس جۇمىستارىن جۇرگىزۋ جانە ولاردى پايدالانۋعا بەرۋ ءۇشىن قاجەتتى جابدىقتاردى دايىنداۋ مەن جەتكىزۋ شارالارىن قامتيدى. سونىمەن قاتار, رەسەي تاراپى قازاقستانعا مەملەكەتتىك ەكسپورتتىق كرەديت تۇرىندەگى جەڭىلدەتىلگەن قارجىلاندىرۋدى ۇسىنباق.
ءماجىلىستىڭ ەكولوگيا ماسەلەلەرى جانە تابيعات پايدالانۋ كوميتەتى زاڭ جوباسىن قاراستىرىپ, قورىتىندى ازىرلەۋگە دايىن ەكەنىن دەپۋتات ەدىل جاڭبىرشين جالپى وتىرىستا مالىمدەدى.
ەسكە سالساق, وتكەن جىلدىڭ قاراشا ايىندا قازاقستان مەن رەسەيدىڭ ەنەرگەتيكا مينيسترلىكتەرى اراسىندا وسى جوبالارعا قاتىستى ىنتىماقتاستىق تۋرالى ءوزارا تۇسىنىستىك مەموراندۋمىنا قول قويىلعان بولاتىن.
بۇل جوبالار قازاقستانداعى جىلۋ ەنەرگياسى تاپشىلىعىن شەشىپ, وڭىرلەردىڭ ەنەرگەتيكالىق قاۋىپسىزدىگىن ارتتىرۋعا مۇمكىندىك بەرەدى دەپ كۇتىلۋدە.
