زاڭگەر: ءانشى سادراددين كونتسەرت وتكىزۋگە قايىرىمدىلىق قورىنان اقشا العان

فوتو: instagram.com/sadraddinn

تانىمال ءانشى ءسادراديننىڭ كونتسەرتىنە “ەلگە كومەك” قايىرىمدىلىق قورىنىڭ باسشىسى ءىلياس ساريەۆ اقشا بولگەن, دەپ حابارلايدى qandastar.kz

بلوگەر انشىگە دەمەۋشى بولىپ, 50 ميلليون تەڭگە بەرگەن دەگەن اقپارات تارادى. زاڭگەر نۇرسۇلتان ورىنبەكتىڭ ايتۋىنشا ءىلياس ساريەۆتىڭ لۋدومانياعا تاۋەلدى بولعان. ودان كەيىن ساحنادا ونەر كورسەتۋدى دە كوزدەپ جۇرگەن.

«لۋدوماننان بولەك ءانشى بولامىن دەپ جۇرگەن جىگىت قوي. ءانشى ءسادرادديننىڭ كونتسەرتىنە 50 ملن تەڭگە ءبولدى دەگەندى ەستىدىم. ونى كوپشىلىك ايتىپ ءجۇر. حالىق ايتسا, قالىپ ايتپايدى. ءسادرادديننىڭ كونتسەرتىنە قوماقتى قارجى بولگەنىن قۇلاعىم شالىپ قالدى. وتكەندە وسى ساريەۆتىڭ ىسىنە قاتىستى بىرنەشە فاكتى شىقتى. وسىنىڭ ءتۇبىن ءبىر زەرتتەپ كورۋ كەرەك. راسىمەن سولاي بولدى ما? ءانشىنىڭ كىناسى جوق, بىراق بۇل فاكتىلەردى تەكسەرۋ كەرەك. ەگەر 50 ملن تەڭگە اۋدارعانى راستالسا, الدانعان اقشا ەكەنى دالەلدەنسە, ءانشى سادراددين ار-ۇيات تۇرعىسىنان حالىقتىڭ اقشاسىن كەرى قايتارۋى كەرەك», – دەدى زاڭگەر.

ايتا كەتەيىك, «ەلگە كومەك» قايىرىمدىلىق قورىنىڭ باسشىسى ءىلياس ساريەۆكە قاتىستى تەرگەۋ باستالعانىن جازعان ەدىك.

الماتى قالالىق پوليتسيا دەپارتامەنتىنىڭ مالىمەتىنشە, ساريەۆتىڭ ءىرى كولەمدەگى الاياقتىق جاسادى دەگەن كۇدىككە ىلىنگەن. قازىرگى ۋاقىتتا 30-دان استام ادام جابىرلەنۋشى رەتىندە تانىلعان. ساريەۆ قازىر قاماۋدا وتىر.