زاڭگەر ءلاززات احاتوۆا: انارۋعا قاتىستى تەرگەۋدە زاڭسىزدىق ورىن الىپ وتىر

زاڭگەر ءلاززات احاتوۆا ءانارۋ قۇرمانالى مەن جانقوش تۇراروۆقا قاتىستى تەرگەۋدە زاڭسىزدىقتار ورىن الىپ جاتقانىن جازدى, – دەپ حابارلايدى qandastar.kz

«بىرىنشىدەن, 20-تامىز كۇنگى بەتتەسۋگە كۇدىكتى ەكى ادۆوكاتپەن بارعان. ال جابىرلەنۋشىنىڭ قاسىندا ەشكىم بولماعان. ادۆوكات الۋ قۇقىعى تۋرالى تۇسىندىرمەگەن دە. تەلەفونىن الىپ قالعان. ال جانقوش تۇراروۆ تەرگەۋ عيماراتىنا تەلەفونمەن كىرگەن, ول ازداي, تەرگەۋشىلەرمەن بىرگە تىسقا شىعىپ, قايتا-قايتا بولەك سويلەسكەن. اجەتحاناعا بارام دەپ, بىرنەشە رەت سۇرانعان.

بەتتەستىرۋ حاتتاماسىن جابىرلەنۋشىگە بەرمەگەن. ساراپتاما قورىتىندىسى شىققاسىن بەرەمىز دەپتى. بۇگىن تاعى سۇراسا, تەرگەۋشى تاعى سولاي جاۋاپ قايتارعان. تاراپتارعا حاتتاما بەرىلۋى ءتيىس. جانە ءار تەرگەۋ امالىن جۇرگىزەردە تاراپتارعا (اسىرەسە جابىرلەنۋشىگە) قۇقىقتارى ءتۇسىندىرىلۋى ءتيىس. ونىڭ ءبىرى دە جاسالماعان. سوعان قاراعاندا, حاتتامانى دا بۇرمالاماق پا, الدە قىزدى مۇلدە تانىمايمىن دەپ, بار بالەنى قىزعا جاپپاق پا, نيەتتەرى تازا ەمەسى انىق», – دەپ جازدى ول فەيسبۋك پاراقشاسىندا.

الماتى قالاسى, اۋەزوۆ اۋداندىق پوليتسيا بولىمىندە بولىپ جاتقان جاعدايعا اشىنعان ادۆوكات

 قۇقىق قورعاۋ ورگاندارىنىڭ قازىرگى بەت-بەينەسىن باياندادى.

«ادام ونسىز دا ءجابىر كورىپ, جانى قينالعاننان بارادى ول جەرگە. ال ولار قۇقىعىڭدى قورعامايدى, قورلايدى. اسىرەسە زورلاۋ فاكتىسى بويىنشا زورلانعان قىزدى تەرگەۋشىلەردىڭ وزدەرى مازاق قىلىپ, كورشىلەرىنە جاريالاپ, كەكەسىندى, قيتۇرقى سۇراقتار قويىپ, ونسىز دا جانى جارالى ءجابىر كورگەن ادامدى مورالنو سىندىرىپ تاستايتىنىن تالاي ەستىگەم.

ءتىپتى قىزى زورلانعان ءبىر كىسىلەر سونداي ارەكەتتەرگە شىداماي, باسقا جاققا كوشىپ كەتكەنىن, ويتكەنى قىز تەرگەۋدەن كەلگەسىن, سۋيتسيد جاساماق بولىپ جاتقان جەرىنەن امان الىپ قالعان دا جايتتار بولعان..ايەلگە الىمجەتتىك جاساۋ, قىزدى قورلاۋ – ءبىر وتباسىنىڭ ەمەس, كۇللى قوعامنىڭ پروبلەماسى بولمايىنشا, ەسەرسوق ەركەكتەردىڭ ەسىرگەنى ەسىرگەن», – دەدى ول.