Zańsyz salynyp jatqan «G-Park» kompanııasynyń «Dublin» turǵyn úı kesheni qashan buzylady?

Memleket basshysy Qasym-Jomart Toqaev elordada beıbereket qurylys salý máselesin oryndy synaıdy. Máselen, Astanany damytý jónindegi keńeste Prezıdent balabaqsha men mektepterdegi oryn tapshylyǵyna, sondaı-aq ruqsaty joq qurylys nysandaryna beker toqtalǵan joq. Memleket basshysy: «Tórt myńǵa jýyq úleskerdiń máselesi áli kúnge deıin kún tártibinen túspeı tur. Ákimdik pen Úkimet bul máseleni jyldyń sońyna deıin sheshýge tıis. Sonymen qatar zańnamalyq bazanyń  osaldyǵy saldarynan qalada jańa túıtkildi nysandar paıda bolýy múmkin. Qazir Astanada ruqsat etilgen qujattary joq 90-nan astam turǵyn úıdiń qurylysy júrip jatyr. Qurylys kompanııalary jaı ǵana mardymsyz aıyppul tólep, azamattardan aqsha tartýyn qoıar emes. Úkimet memlekettik retteý sharalaryn qatańdatqany jón. Qurylys kompanııalarynyń zańdy belden basyp, úleskerlerden aqsha tartýyna jol berýge bolmaıdy. Bul jumysqa Qarjylyq monıtorıng agenttigi atsalysýǵa tıis,» – dep uıǵarym jasady.

Endi dál sondaı ótkir másele kún tártibine shyqty. «G-Park» kompanııasy (enshiles kompanııasy «Stroy Group kz — 2021» JShS) «Dublin» turǵyn úı keshenindegi qurylysty eshbir qujatsyz bastap ketken. Sonyń kesirinen ǵımarat salynyp jatqan jerdiń astynan jylý magıstrali óte almaı turalap tur. Astana qalasynyń ákimdigi «VD Stroı-ınjınırıng» JShS-ne 2023-2024 jj. jylytý maýsymy bastalǵansha jylý magıstraldyq jobasyn ýaqytyly aıaqtaý mindettegen. Al zańsyz ǵımaratty aınalyp ótý de múmkin emes. Jobalyq-smetalyq qujattama talaptaryna saı atalǵan ýchaskede jylý trassasyn tóseý boıynsha qurylys-montajdaý jumystaryn jalǵastyrý múmkin emes. Muny Memleket basshysynyń Qorǵaljyn tas joly boıynsha gaz jylý stanııasyn iske qosý jáne Astana qalasynda jylý energııasynyń tapshylyǵyn tómendetý jónindegi tapsyrmasyna nemquraıly qaraý dep túsinýge bolady.

Osyǵan baılanysty, 2023 jylǵy 14 aqpanda «Astana qalasynyń otyn-energetıkalyq kesheni jáne kommýnaldyq sharýashylyq basqarmasy» MM «G-Park» kompanııasynyń enshiles uıymy «Stroy Group kz-2021» JShS-ne jylý trassasy ýchaskesindegi zańsyz salynǵan «Dublin» turǵyn úı keshenin buzý týraly Astana qalasynyń mamandandyrylǵan aýdanaralyq ekonomıkalyq sotyna talap aryz bergen. 2023 jylǵy 4 sáýirde sot sheshimimen talap aryz tolyq qanaǵattandyryldy, «Stroy Group kz-2021» JShS-i óz esebinen qurylysty buzýǵa mindetteý týraly sheshim qabyldandy. Sottyń bul sheshimi jedeldetilip oryndalýǵa jiberildi.

Alaıda, qyzyqtyń kókesi basqasha bolyp tur. Sottyń sheshimi bola tura «G-Park»kompanııasy «Dublin» turǵyn úı keshenin salýdy toqtatýdyń ornyna jandandyra túsken. Sh.Aıtmatov pen J. Moldaǵalıev kósheleriniń qıylysyndaǵy ǵımarattyń irgetasyna monolıt quıý jumystary bitip, birinshi qabattyń kirpish konstrýkııalary órilip jatyr. Astana qalasynyń Geoaqparattyq ortalyǵynyń málimetinshe, turǵyn úı kesheniniń irgetasy quıylǵan jerdiń nysanaly maqsaty dene shynyqtyrý-saýyqtyrý keshenin salý úshin berilgen (https://www.gov.kz/memleket/entities/astana-saulet?lang=kz. Kadastrlik nómiri: 213201355281). Demek, qurylys kompanııasy nysanaly maqsatqa kóz juma qaraǵan.

«G-Park» kompanııasy «Dublin» turǵyn úı kesheniniń  qurylysy byltyr bastalǵan. Alaıda, qurylys-montaj jumystaryna qatysty qurylystyń bastalǵany týraly habarlama jiberilmegen, jer ýchaskesine tıisti quqyq, zańnamada belgilengen saraptamadan ótken jobalyq qujat, avtorlyq jáne tehnıkalyq qadaǵalaý sekildi sharttardyń birde-biri jasalmaǵan. Osylaısha, qoldanystaǵy zańnamanyń talaptary óreskel buzylyp, óz betinshe qurylys salýǵa kirisip ketken.

Sondaı-aq, qurylys kompanııasy kúlli aqparat pen jaǵdaıdy bile turyp, baspananyń salýyn toqtamaǵanyn eskersek, bul bolashaqta úleskerler arasynda áleýmettik shıelenisti týdyratyny anyq.

Astana qalasynyń mamandandyrylǵan aýdanaralyq ekonomıkalyq soty «Stroy Group kz-2021» JShS-niń óz esebinen qurylysty buzýdy mindettedi. Sottyń sheshimi jedel júzege aspasa Esil aýdanyndaǵy birshama turǵyn úı ekinshi Ekibastuzdyń kebin kıip, qysty jylýsyz qarsy alý qaýpi bar. «G-Park» kompanııasynyń jeke múddesi qarapaıym halyqtyń soryna aınalmasa ıgi.