زاڭسىز سىياقى العان: وسكەمەندە حقكو بۇرىنعى باسشىسى سوتتالدى

فوتو: اشىق دەرەككوز

قارجى مونيتورينگى اگەنتتىگى شىعىس قازاقستان وبلىسى بويىنشا دەپارتامەنتى «ازاماتتارعا ارنالعان ۇكىمەت» كەاق فيليالىنىڭ وسكەمەندەگى مامانداندىرىلعان ءبولىمىنىڭ بۇرىنعى باسشىسىنا قاتىستى قىلمىستىق ءىستى اياقتادى, دەپ جازدى qandastar.kz

2023 جىلدىڭ اقپان مەن قازان ايلارى ارالىعىندا كۇدىكتىنىڭ جۇرگىزۋشى كۋالىگىن الۋ ءۇشىن جول قوزعالىسى ەرەجەلەرىن بىلۋگە تەوريالىق ەمتيحان تاپسىرعان ازاماتتاردان زاڭسىز سىياقى الۋ سحەماسىن ۇيىمداستىرعانى انىقتالدى.

«Follow the money قاعيداتى بويىنشا تەرگەۋ ءىس-قيمىلدارىن جۇرگىزۋدى كوزدەيتىن اگەنتتىكتىڭ «پاراللەلدى قارجىلىق تەرگەۋ» ىسكە اسىرىلىپ جاتقان جوباسى 32 ميلليون تەڭگەدەن استام زاڭسىز سىياقىلار تۇرىندە الىنعان قىلمىستىق تابىستى انىقتاۋعا مۇمكىندىك بەردى», – دەلىنگەن حابارلامادا.

تەرگەۋ بارىسىندا كۇدىكتىنىڭ بانكتەگى جەكە شوتىنا ءموبيلدى قوسىمشا ارقىلى سىياقى العانى بەلگىلى بولدى.

مۇنداي كىرىستەر قۇقىق قورعاۋ ورگاندارىندا كۇدىك تۋدىرۋى مۇمكىن ەكەنىن ءتۇسىنىپ, ولاردىڭ قىلمىستىق شىعۋ تەگىن جاسىرۋ ماقساتىندا كۇدىكتى سول بانكتەگى شوتتارى اراسىندا بىرنەشە رەت اۋدارىمدار جاساعان.

«بۇدان باسقا, پاراللەلدى قارجىلىق تەرگەۋ شەڭبەرىندە قىلمىستىق اقشا قاراجاتىنا كۇدىكتىنىڭ وسكەمەندەگى ەكى بولمەلى پاتەر ساتىپ الىنعانى جانە ونى جاسىرۋ ماقساتىندا اناسىنا رەسىمدەلگەنى انىقتالدى. كەيىننەن بۇل پاتەر تاۋلىكتىك جالعا بەرۋ ءۇشىن پايدالانىلىپ, 1,2 ميلليون تەڭگەدەن استام قوسىمشا قىلمىستىق تابىس اكەلگەن», –دەلىنگەن حابارلامادا.

سونىمەن قاتار تاركىلەۋگە جول بەرمەۋ ماقساتىندا كۇدىكتى سوتالدى تەرگەپ-تەكسەرۋ باستالعاننان كەيىن اتالعان پاتەردى ساتىپ الۋ-ساتۋ شارتتارى بويىنشا ءۇشىنشى تۇلعالارعا تىركەگەن. سوت ۇكىمى بويىنشا, كۇدىكتى كىنالى دەپ تانىلدى. وعان قىلمىستىق جولمەن الىنعان 19,5 ميلليون تەڭگە بولاتىن وسكەمەندەگى ەكى بولمەلى پاتەردى مەملەكەت كىرىسىنە تاركىلەي وتىرىپ, 3 جىل مەرزىمگە باس بوستاندىعىن شەكتەۋ تۇرىندەگى جازا تاعايىندالدى.

ەسكە سالايىق, بۇعان دەيىن قاراعاندى وبلىسىندا ءبىر توپ حالىققا قىزمەت كورسەتۋ ورتالىعىنىڭ قىزمەتكەرلەرى 30-دان استام جۇك كولىگىن باستاپقى تىركەۋدەن زاڭسىز وتكىزگەنىن جازدىق. جەرگىلىكتى بيۋدجەتكە 315 ملن تەڭگەدەن استام سوماعا تولەم تۇسپەگەن. كۇدىكتى رەتىندە مامانداندىرىلعان حقكو-نىڭ بۇرىنعى باسشىسى جانە حقكو باسشىسىنىڭ ورىنباسارى ۇستالدى. سوت ولاردى «قاماۋدا ۇستاۋ» تۇرىندەگى بۇلتارتپاۋ شاراسىنا سانكتسيا بەردى