زەينوللا سانىكتىڭ تۋعانىنا 90 جىل: «سانىك وقۋلارى» بايقاۋى ءوتتى

فوتو: اشىق دەرەككوز

15 ساۋىردە تانىمال جازۋشى جانە ەتنوگراف-عالىم, باسپاگەر زەينوللا سانىكتىڭ تۋعانىنا 90 جىل تولۋىنا وراي قالامگەر تۇرعان ۇيگە ورناتىلعان ەسكەرتكىش تاقتا اشىلدى, دەپ جازدى qandastar.kz

سونىمەن بىرگە ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىندە ءداستۇرلى «سانىك وقۋلارى» اياسىندا ستۋدەنتتەر مەن ماگيسترانتتار اراسىندا رەسپۋبليكالىق بايقاۋ ءوتتى. ءبىلىم جارىسى جازۋشىنىڭ مۇراسىن وسكەلەڭ ۇرپاققا كەڭىنەن ناسيحاتتاۋ مەن جاس عالىمداردىڭ شىعارماشىلىق ويى مەن جوبالارىن جۇزەگە اسىرۋعا ىقپال ەتۋدى ماقسات ەتكەن.

قاتىسۋشىلار «ۇزدىك عىلىمي جۇمىس», «ۇزدىك ءباسپاسوز ماتەريالى», «ديزاين ونەرىنىڭ ۇزدىك تۋىندىسى», «ۇزدىك دەرەكتى فيلم» نوميناتسيالار بويىنشا باق سىنادى. ۇزدىكتەر زەينوللا سانىك اتىنداعى ارنايى شاكىرتاقى يەگەرى اتاناى. ادىلقازىلار القاسى قۇرامىندا قازۇۋ وقىتۋشى- پروفەسسورلارى, تانىمال جۋرناليستەر, بەلگىلى رەداكتورلار, قوعام قايراتكەرلەرى بار.

زەينوللا مۇباراك ۇلى سانىك 1935 جىلدىڭ 15 ساۋىرىندە قحر, تارباعاتاي ايماعىنا قاراستى شاعانتوعاي اۋدانىندا دۇنيەگە كەلگەن. بەيجىڭ قالاسىنداعى ورتالىق جاستار ينستيتۋتىن ءبىتىرىپ, ەڭبەك جولىن باسپاگەرلىكتەن باستاعان. «حالىق باسپاسى», «شىڭجاڭ حالىق باسپاسى, «شىڭجاڭ جاستار ورەندەر» باسپاسىندا اعا رەداكتور, جەتەكشى رەتىندە قىزمەت اتقاردى.

2000 جىلى تاريحي وتانىنا ورالىپ, زەرتتەۋ جۇمىستارىن جالعاستىردى.

بەيسەنعالي سادىقان ۇلىمەن بىرگە قابانباي تۋرالى «قابانباي باتىر» تۇڭعىش جيناعىن قۇراستىردى. سونىمەن بىرگە  «حان باتىر قابانباي»,  «تاۋ جۇلدىزى», «قازاقتىڭ تۇرمىس-سالت بىلىمدەرى», «تابيعات ءتالىمى», «دالا مادەنيەتى تۋرالى تولعانىستار», «قايراقباي», «باسباي», «سەرگەلدەڭ», «ءىز», «تۇعىرىل حان – دەمەجان باتىر», «قازاق ەتنوگرافياسى», «سۇلەيمەن بي», ت.ب كىتاپتارى جارىق كوردى. 15 تومدىق مۇراسى جارىق كورگەن جازۋشى قازاق تاريحى جانە مادەنيەتىنىڭ دامۋىنا, قايتا جاڭعىرۋىنا ولشەۋسىز ۇلەس قوستى. 2018 جىلى قۇرىلعان زەينوللا سانىك اتىنداعى مادەنيەت قورى ۇلت رۋحانياتى- قازاق ادەبيەتى مەن ونەرىنىڭ دامۋىنا قولداۋ كورسەتىپ كەلەدى.