Zelenskıı men Pýtın Túrkııada kezdesýi múmkin

Ýkraına prezıdenti Vladımır Zelenskıı Reseımen aldaǵy kelissózder qaıda ótýi múmkin ekenin aıtty, dep habarlaıdy Qandastar.kz

«Osy aptada Túrkııamen, Parsy shyǵanaǵy elderimen, Eýropa elderimen sóılesemiz. Bul memleketter reseıliktermen kelissóz júrgizýge arnalǵan alań bolýy múmkin.  О́z tarapymyzdan soǵysty toqtatýǵa barynsha daıyndalamyz», – dedi Zelenskıı.

Ýkraına basshysy aldaǵy oqıǵalardyń qalaı bolatyny AQSh sekildi alpaýyt el kóshbasshylarynyń erik-jigerine baılanysty ekenin basa aıtty.

«Reseı shynaıy kelissózden jaltarǵysy keletinin ǵana baıqatyp otyr. Muny kúshti sankııalarmen, tarıftermen ǵana ózgertýge bolady. Biz de óz tarapymyzdan yqpal etýi múmkin qadamdardy jasap jatyrmyz», – dedi Ýkraına prezıdenti.

Buǵan deıin Reseıdiń syrtqy ister mınıstri Sergeı Lavrov NBC News arnasyna bergen suhbatynda kelissózder Ystanbulda jalǵasýy múmkin ekenin aıtqan bolatyn.