زەلەنسكي وكىلەتتىگىن توقتاتا ما?

فوتو:  Alessandra Tarantino

ۋكراينا پرەزيدەنتى ۆلاديمير زەلەنسكي ەلدەگى بەيبىتشىلىكتى قامتاماسىز ەتۋ نەمەسە ۋكراينانىڭ ناتو-عا كىرۋى ءۇشىن ءوز قىزمەتىنەن كەتۋگە دايىن ەكەنىن مالىمدەدى, دەپ حابارلايدى qandastar.kz

23 اقپان 2025 جىلى كيەۆتە وتكەن ءباسپاسوز ءماسليحاتىندا زەلەنسكي: «ەگەر ۋكراينا ءۇشىن بەيبىتشىلىك قاجەت بولسا, مەنىڭ قىزمەتىمنەن كەتۋىمدى قالاساڭىزدار, مەن دايىنمىن. نەمەسە بۇل قىزمەتتى ناتو-عا مۇشەلىككە ايىرباستاۋعا بولادى, ەگەر مۇنداي شارتتار بىردەن بولسا», – دەدى.

بۇل مالىمدەمە اقش پرەزيدەنتى دونالد ترامپتىڭ ۋكرايناعا قاتىستى تالاپتارىنان كەيىن جاسالدى. ۆاشينگتون كيەۆتەن سيرەك كەزدەسەتىن جەر رەسۋرستارى بويىنشا كەلىسىم جاساۋدى تالاپ ەتىپ, ۋكراينادان 500 ميلليارد دوللار كولەمىندە تولەم سۇراعان بولاتىن. ترامپتىڭ ايتۋىنشا, اقش ۋكرايناعا كەمىندە 350 ميلليارد دوللار كومەك كورسەتكەن جانە ونى وتەۋدى قالايدى.

زەلەنسكي بۇل تالاپقا قاتىستى: «سەرىكتەستەرگە دەگەن بارلىق قۇرمەتىمىزبەن, ءبىز 500 ميلليارد دوللار قارىزدى مويىندامايمىز», – دەپ جاۋاپ بەردى. ونىڭ ايتۋىنشا, كيەۆتىڭ دەرەكتەرى بويىنشا, كومەك كولەمى تەك 100 ميلليارد دوللاردى قۇرايدى جانە بۇرىنعى اقش پرەزيدەنتى دجو بايدەنمەن جاسالعان كەلىسىمدەرگە سايكەس, بۇل كومەك گرانت رەتىندە بەرىلگەن.

اعىمداعى اپتادا ۆاشينگتون كيەۆكە تابيعي رەسۋرستار بويىنشا جاڭا كەلىسىم جوباسىن ۇسىندى. قۇجاتقا سايكەس, ۋكراينا تابيعي رەسۋرستاردان, سونىڭ ىشىندە مينەرالدار, گاز جانە مۇنايدان الىناتىن كىرىستەردىڭ جارتىسىنان, سونداي-اق پورتتار مەن باسقا ينفراقۇرىلىمنان تۇسەتىن تابىستاردان باس تارتۋى كەرەك. بۇل كىرىستەر تولىعىمەن اقش-قا تيەسىلى قورعا جىبەرىلەدى. ۋكراينا بۇل قورعا ونىڭ كولەمى 500 ميلليارد دوللارعا جەتكەنشە جارنالار تولەۋگە مىندەتتى بولادى.

اقش قارجى ءمينيسترى سكوتت بەسسەنت بۇل كەلىسىمگە قاتىستى كوپتەگەن اقپاراتتىڭ بۇرمالانعانىن نەمەسە جالعان بەرىلگەنىن مالىمدەدى.