Zelenskıı Pýtınniń shaqyrýynan bas tartyp, oǵan Kıevke kelýdi usyndy

Kollaj: Stan.kz

Ýkraına prezıdenti Vladımır Zelenskıı Pýtınniń Máskeýde beıbit kelissózder júrgizý týraly usynysyn qabyldamaı, ony Kıevke shaqyrdy, dep jazdy qandastar.kz

Bul týraly Stan.kz aqparat agenttigi ABC News basylymyna silteme jasap habarlaıdy.

Zelenskıı Reseı prezıdenti Pýtınge Ýkraınaǵa kelýdi usyndy.

«Ol Kıevke kelse bolady. Qazir soǵys bolyp jatqanda, Kıevten Máskeýge barý orynsyz ári qolaısyz. Eger men de oǵan Kıevke mindetti túrde kelsin desem, ol da orynsyz bolar edi», – dedi Ýkraına prezıdenti.

Zelenskııdiń pikirinshe, Pýtın mundaı usynysty kezdesýdi keıinge shegerý úshin jasaǵan.

Ýkraına prezıdenti el kún saıyn raketalyq soqqylarǵa jáne shabýyldarǵa ushyrap jatqanda Máskeýge bara almaıtynyn aıtty. Sondaı-aq Pýtınniń muny «túsinetinin» jetkizdi.

Aıta keteıik, buǵan deıin AQSh prezıdenti Donald Tramp ózi, Pýtın jáne Zelenskıı arasynda úshjaqty kezdesý ótetinin aıtqan edi. Alaıde Reseı men Ýkraına prezıdentteriniń jeke kezdesý ótkizetinine kúmán keltirgen.