زەلەنسكيدەن كۇدەر ۇزۋگە ءالى ەرتە: دروندار ءپۋتيننىڭ «جەڭىس ستسەناريىن» وزگەرتۋدە

ۋكراينانىڭ قازىرگى احۋالى بۇعان دەيىنگى كەزەڭدەردىڭ كەز كەلگەنىمەن سالىستىرعاندا اناعۇرلىم ءتاۋىر. اسكەري جاعداي تۇراقتالىپ, مايدان نەگىزىنەن دونباسس وبلىسى, رەسەيدىڭ بەلگورود, كۋرسك وڭىرىنە قاراي ويىسۋدا, دەپ جازدى qandastar.kz

ەڭ قىزىعى, سوڭعى ۋاقىتتا ۇرىستىڭ باسىم بولىگى ۋكراينا ەمەس, رەسەيدىڭ ءوز تەرريتورياسىندا وتۋدە. بۇعان دەيىن باسقىنشى ءرولىن اتقارعان كرەمل قازىر قورعانۋشى پوزيتسياسىنا امالسىز كوشكەندەي.

ۋكراينا ارمياسى ءۇشىن ماڭىزدى كورسەتكىشتىڭ ءبىرى — ادام شىعىنى شامامەن 30 پايىزعا ازايعان. 

مۇنىڭ باستى سەبەبى: دروندار. ولار دۇشپاننىڭ كوزىن جويىپ, ۋكراين ساربازدارىن امان ساقتاپ قالۋدا.

العى شەپتەگى اۆياتسيا دا كۇشەيە ءتۇستى. «فاب» سىندى قارۋلار (قۋاتتى اۋە بومبالارى) بىزدە دە بار ەكەنىن بىرەۋ بىلسە, بىرەۋ بىلمەۋى مۇمكىن. 

اسكەردى باسقارۋ ءىسى دە جاقسارىپ كەلەدى: سىرسكي سىندى بىلىكتى قولباسشىلاردىڭ تاجىريبەسى مول, جانىندا دراپاتىي ءتارىزدى سەنىمدى ارىپتەستەرى بار. ارينە, بۇل باعىتتاعى الەۋەتىمىز ءالى دە ارتا تۇسپەك, كەلەسى بەسىنشى جىلى قارۋلى كۇشتەرىمىز بۇرىنعىدان دا ءتيىمدى ارەكەت ەتەدى دەگەن سەنىم زور.

ترامپتىڭ ۋكرايناعا قاتىستى ەكىۇشتى ساياساتى باستاپقىدا ۋكراين جاۋىنگەرلەرىنىڭ مورالدىق جاعدايىنا اسەر ەتە مە دەگەن الاڭ بولعان. الايدا, ۋكرايندىق ساربازدار مايدانداعى جاعدايدى سانالى تۇردە سارالاپ, ساياسي الاڭداعى اۋىتقۋلاردان سەسكەنبەيتىنىن دالەلدەدى. 

اقش-تان قارۋ-جاراق ءالى دە كەلۋدە (بايدەن اتاعا راقمەت!), جاقىن ۋاقىتتا ەۋروپادان دا اۋقىمدى كومەك كەلەدى. باتىس ەلدەرى «اسارلاتىپ», ۋكرايناعا قوسىمشا 15 ميلليارد دوللار بولمەك. 

ۋكراينانىڭ تىلداعى جاعدايى بىرقالىپتى. ەل ىشىندە جەر استىنداعى جاڭا اسكەري زاۋىتتاردىڭ قۇرىلىسى ءجۇرىپ جاتىر. 

اشكەرە تەلەگرام ارناسى حابارلاعانداي, وتاندىق قورعانىس ونەركاسىبى كوز ىلەسپەس جىلدامدىقپەن دامۋدا. مىسالى, وتكەن جىلى 2 ميلليون درون وندىرىلسە, بيىل بۇل كورسەتكىشتى 4, ءتىپتى 4,5 ميلليونعا جەتكىزۋ مەجەلەنىپ وتىر. 

بۇگىندە ەلىمىزدە دروننىڭ 100-گە تارتا ءتۇرى قۇراستىرىلىپ, جاپپاي قولدانىسقا ەنگىزىلگەن. ىشىندە جاۋدىڭ بارلاۋشى دروندارىن قاعىپ تۇسىرەتىن ارنايى ۇلگىلەرى دە بار. مۇندايدى بۇرىن تەك عىلىمي فانتاستيكادان وقيتىن ەدىك, ۋكراينا سونىڭ ءبارىن شىنايى ومىردە جۇزەگە اسىرۋدا.

ديپلوماتيالىق مايداندا العاشقىدا ترامپتىڭ ساياسي باعىتى كيەۆتى ابىگەرگە سالعانىمەن, قازىرگى تاڭدا ۋكراينا ديپلوماتتارى جاڭا احۋالعا بەيىمدەلىپ ۇلگەردى. پرەزيدەنتىمىز بەن ديپلوماتتارىمىز ۋكراينا مۇددەسىن بەرىك قورعاپ, بەتون قابىرعاداي قالقان بولىپ تۇر. 

ەگەر ءبىر كەلىسىمدەرگە قول قوياتىن بولساق تا, قاجەت كەزىندە ورىنداماۋ قۇقىمىز بار. بۋداپەشت مەموراندۋمى بىزگە جاقسى ساباق بولدى. 

سوعىس جالعاسۋدا, الدا تالاي اسۋ بار. الايدا كيەۆ ءوزىنىڭ پوزيتسياسىن بۇرىن-سوڭدى بولماعان دەڭگەيدە بەرىك ۇستاۋدا.

پىكىر يەسى: ناتاليا ياشين, جۋرناليست