زەرتتەۋ: قازاقستاندا پرەزيدەنتكە سەنىم قانداي دەڭگەيدە?

فوتو: اشىق دەرەككوز

قر پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتى اعىمداعى جىلدىڭ 11 شىلدەسى مەن 12 تامىزى ارالىعىندا كەڭ اۋقىمدى ساۋالناما وتكىزدى. وعان 17 وبلىس پەن استانا, الماتى, شىمكەنت قالالارىنان 18 جاستان اسقان 8000 ادام قاتىستى, دەپ جازدى qandastar.kz

الەۋمەتتىك زەرتتەۋ رەسپوندەنتتەردىڭ پرەزيدەنت ينستيتۋتىنا سەنىمىنىڭ زور ەكەنىن كورسەتتى: ازاماتتاردىڭ 82,4% قاسىم-جومارت توقاەۆقا ۇلكەن قولداۋ ءبىلدىرىپ وتىر.

ەڭ جوعارى دەڭگەيدە قولداۋ كورسەتىپ وتىرعاندار – 18-29 جاس ارالىعىنداعى قازاقستاندىقتار (90,3%). ودان كەيىنگى ورىنداردا 30-45 جاستاعىلار (82,4%), 46-60 جاستاعىلار (78,6%) جانە 61 جاستان اسقاندار (77,8%) تۇر.

اۋىل تۇرعىندارىنىڭ سەنىمى قالا حالقىنا قاراعاندا ءسال جوعارى (سايكەسىنشە, 84,9% جانە 80,9%).

تابىس دەڭگەيى مەن جۇمىسپەن قامتىلۋ ەرەكشەلىكتەرىنە قاراماستان, رەسپوندەنتتەردىڭ سەنىم دەڭگەيى بىردەي دارەجەدە.

پرەزيدەنتكە ەڭ كوپ قولداۋ بىلدىرەتىندەر: ءبىلىم بەرۋ سالاسىنىڭ قىزمەتكەرلەرى (89,6%), دەنساۋلىق ساقتاۋ ماماندارى (84,5%), مەملەكەتتىك قىزمەتشىلەر (87,1%), قۇقىق قورعاۋ ورگاندارىنىڭ قىزمەتكەرلەرى (96,9%), اۋىل شارۋاشىلىق سالاسىنىڭ وكىلدەرى (86,2%), عىلىم (85,7%), مادەنيەت پەن ونەر سالاسىنىڭ ماماندارى (85,9%).

زەرتتەۋ قورىتىندىسى ەل اراسىندا پرەزيدەنتكە سەنىمنىڭ تۇراقتى جوعارى دەڭگەيدە ەكەنىن ايقىن كورسەتتى. بۇل ءوز كەزەگىندە جۇرگىزىلىپ جاتقان مەملەكەتتىك ساياساتتىڭ ازاماتتار ءۇشىن تيىمدىلىگىن دالەلدەيدى.