جاڭالىقتار
«جاعدايلارى اۋىر»: قاراعاندى فەرروقورىتپا زاۋىتىدا اپات بولىپ, 8 جۇمىسشى جاراقات الدى
فوتو: instagram.com/yddcorporation
قاراعاندى فەرروقورىتپا زاۋىتىندا توتەنشە جاعداي بولىپ, 8 جۇمىسشىسى ءارتۇرلى دارەجەدە جاراقات الدى. بۇل تۋرالى Stan.kz اقپارات اگەنتتىگى حابارلايدى.
بۇل اقپارات كاسىپورىننىڭ جەلىدەگى پاراقشاسىندا جاريالاندى.
«20 شىلدە تاڭعى ساعات 04:10-دا YDD Corporation فەرروقورىتپا زاۋىتىندا شتاتتان تىس جاعداي بولدى. № 1 پەشتەن كەنەتتەن جالىن شىعىپ, سالدارىنان كاسىپورىننىڭ 8 جۇمىسشىسى ءارتۇرلى دارەجەدە جاراقات الدى.
قازىرگى ۋاقىتتا زارداپ شەككەن جۇمىسكەرلەردىڭ بارلىعى اۋرۋحاناعا جەتكىزىلدى, ولارعا شۇعىل مەديتسينالىق كومەك كورسەتىلىپ جاتىر. كومپانيا زارداپ شەككەندەرگە جان-جاقتى كومەك كورسەتىپ جاتىر جانە اۋرۋحانانىڭ مەديتسينالىق قىزمەتكەرلەرىمەن ۇنەمى بايلانىستا», – دەيدى YDD Corporation فەرروقورىتپا زاۋىتىنىڭ ءباسپاسوز قىزمەتى وكىلدەرى.
دەنساۋلىق ساقتاۋ باسقارماسى زارداپ شەككەندەردىڭ جاعدايى تۋرالى تۇسىنىكتەمە بەردى.
«2024 جىلعى 20 شىلدەدە پروفەسسور ح.ج.ماقاجانوۆ اتىنداعى كوپسالالى اۋرۋحاناعا وندىرىستە العان كۇيىك جاراقاتتارىمەن ونەركاسىپ كاسىپورنىنىڭ 8 قىزمەتكەرى جەتكىزىلدى. زارداپ شەككەندەردىڭ التاۋى رەانيماتسيا جانە قارقىندى تەراپيا بولىمىنە, ەكەۋى كومبۋستولوگيا بولىمىنە جاتقىزىلدى. زارداپ شەككەن بەس ادامنىڭ جاعدايى وتە اۋىر, ەكەۋى اۋىر, ءبىر ناۋقاس ورتاشا اۋىر دەپ باعالانادى. زارداپ شەككەندەردى بەيىندى ماماندار قارادى. قوسىمشا تەكسەرۋلەر جۇرگىزىلدى. پاتسيەنتتەر تولىق كولەمدى بارلىق قاجەتتى ەم الىپ جاتىر», – دەپ حابارلادى قاراعاندى وبلىسى دەنساۋلىق ساقتاۋ باسقارماسىنىڭ ءباسپاسوز قىزمەتى.
اتالعان فاكتى بويىنشا قىلمىستىق ءىس قوزعالدى.
«قاراعاندىداعى فەرروقورىتپا زاۋىتىندا بولعان فاكت بويىنشا قر قك 156-بابىنىڭ 2-بولىگى «ەڭبەكتى قورعاۋ ەرەجەلەرىن بۇزۋ ناتيجەسىندە ابايسىزدا دەنساۋلىققا اۋىر زيان كەلتىرۋ» بويىنشا قىلمىستىق ءىس قوزعالدى. قازىرگى ۋاقىتتا تەرگەۋ شارالارى جۇرگىزىلىپ جاتىر. ءمان-جايلار انىقتالىپ جاتىر», – دەپ حابارلادى قاراعاندى وبلىسى پد ءباسپاسوز قىزمەتى.
سونىمەن قاتار بۇل جاعدايعا بايلانىستى ارنايى كوميسسيا قۇرىلدى.
«قاراعاندىداعى فەرروقورىتپا زاۋىتىندا بولعان فاكت بويىنشا بولعان وقيعانىڭ سەبەبى مەن ءمان-جايىن تەكسەرۋ ءۇشىن ەڭبەك ينسپەكتسياسى كوميسسيا قۇردى», – دەپ مالىمدەدى ەڭبەك ينسپەكتسياسى باسقارماسىنىڭ ءباسپاسوز قىزمەتى.
قاراعاندىداعى فەرروقورىتپا وندىرىسى YD Corporation جشس اتىمەن تانىلعان. وىڭ قۇرىلتايشىلارى: ەرلان نىعماتۋلين, جارمۇحامەد اپپاز جانە Imperiyumcy Holdings Limited.
