جاڭالىقتار
جايلاۋدا ءجۇرىپ, ءىننىڭ ىشىنەن مىلتىق تاۋىپ العان مالشى 2 جىلعا سوتتالدى
فوتو: istockphoto.com
الماتى وبلىسىنداعى «اقكول» جايلاۋىندا ءىننىڭ اۋزىنان ءبىر قاپ قارۋ تاۋىپ العان مالشىنىڭ باس بوستاندىعى ەكى جىلعا شەتتەلدى, دەپ حابارلايدى Azattyq Rýhy.
وقيعا بيىل شىلدە ايىندا بولعان.
«الماتى وبلىسى رايىمبەك اۋدانى, جامبىل اۋىلدىق وكرۋگىنە قاراستى «اققول» جايلاۋىندا مالشى مال جايىپ جۇرگەن كەزدە ءىننىڭ اۋزىنان شىعىپ تۇرعان اق ءتۇستى قاپتى كورگەن. قاپتىڭ ىشىندە ەشبىر قۇجاتسىز «ۆەپر-308» جانە «توز-8» ماركالى قارۋلار, 308 win كاليبرلى جانە 5,6 كاليبرلى مىلتىقتاردىڭ وق-ءدارىسى بولعان. مالشى قاپتى اتىنا تيەپ الىپ, قاراتوعان اۋىلىنداعى ۇيىنە اپارعان», – دەپ حابارلايدى الماتى وبلىسىنىڭ سوتتارى.
ءىستى قاراعان رايىمبەك اۋدانىنىڭ سوتى مالشىنىڭ شىن نيەتپەن وكىنگەنىن ەسكەرىپ ءارى قىلمىستىق جاۋاپكەرشىلىگىن اۋىرلاتاتىن ءمان-جايلار جوق بولعان سوڭ وعان 2 جىل باس بوستاندىعىن شەكتەۋ تۋرالى ۇكىم تاعايىندادى.
