Jaılaýda júrip, inniń ishinen myltyq taýyp alǵan malshy 2 jylǵa sottaldy

Foto: istockphoto.com

Almaty oblysyndaǵy «Aqkól» jaılaýynda inniń aýzynan bir qap qarý taýyp alǵan malshynyń bas bostandyǵy eki jylǵa shetteldi, dep habarlaıdy Azattyq Rýhy.

Oqıǵa bıyl shilde aıynda bolǵan.

«Almaty oblysy Raıymbek aýdany, Jambyl aýyldyq okrýgine qarasty «Aqqól» jaılaýynda malshy mal jaıyp júrgen kezde inniń aýzynan shyǵyp turǵan aq tústi qapty kórgen. Qaptyń ishinde eshbir qujatsyz «VEPR-308» jáne «TOZ-8» markaly qarýlar, 308 win kalıbrli jáne 5,6 kalıbrli myltyqtardyń oq-dárisi bolǵan. Malshy qapty atyna tıep alyp, Qaratoǵan aýylyndaǵy úıine aparǵan», – dep habarlaıdy Almaty oblysynyń sottary.

Isti qaraǵan Raıymbek aýdanynyń soty malshynyń shyn nıetpen ókingenin eskerip ári qylmystyq jaýapkershiligin aýyrlatatyn mán-jaılar joq bolǵan soń oǵan 2 jyl bas bostandyǵyn shekteý týraly úkim taǵaıyndady.