جايناگۇل حاميدوللا: ءانارۋدى جاقسى تۇسىنەمىن, اتاعى دارداي اقىندار ءبىزدى دە وڭاشا كەزدەسۋلەرگە شاقىراتىن

ءبىز دە بەس تيىنىمىزدى قىستىرا كەتەيىك.

اۋەلى, ءانارۋ دەگەن اتىن ەستىگەندە “قانداي ەرەكشە, ادەمى ەسىم” دەپ ويلاعام. سويتسەك اناسى اقىن, اكەسى سازگەر ەكەن. اتا-اناسىنىڭ قارىم-قاتىناسىن, اكەسىنىڭ ايتقاندارىن قازبالاماي تۇرىپ, فيلفاكتا وقىعان, اجەپتاۋىر ولەڭ شىعارىپ قوياتىن قۇربى قىزدارى بار ادام رەتىندە مىناعان توقتالايىن:

ءانارۋدىڭ اڭگىمەسى تانىس. ويتكەنى ءوزىمىز دە استانادا وقىدىق, اقىن-جازۋشى, زيالى قاۋىم سو جاقتا كوبىرەك دەگەندەي. ءبىرىمىز ولەڭ شىعارىپ, ءبىرىمىز جاتا-جاستانا ولەڭ وقىپ, ارمان قۋىپ باس قالاعا وقۋعا باردىق. نەبىر “زيالىنىڭ” ەل الدىندا ايتىپ جۇرگەنىنەن مۇلدە بولەك جەكە اڭگىمەسىن دە ەستىدىك. اتامىزبەن جاستى, اتاعى دارداي اقىندار “داۋىسىڭ جاقسى ەكەن, راديوعا جۇمىسقا ورنالاستىرىپ بەرەمىن, كوفە ىشەيىك” دەگەن سىلتاۋمەن وڭاشا كەزدەسۋلەرگە شاقىراتىن. “الماتىدان دوس جىگىت كەلىپ ەدى, سەن دە قۇربىڭدى ەرتە كەل, تاكسي اقىسىن ءوزىم تولەيمىن” دەپ مەيرامحانالاردىڭ مەكەن-جايىن جىبەرەتىن. “اقىندار بوپ وتىرمىز” دەپ جاپ-جاس قىزداردى پاتەرگە الدىرعاندارى دا بولدى. تۇنگى كلۋبتا كەزدەسەتىن. ەۇۋ-دا جىلدا جاتاقحانا جىرى باستالاتىندىقتان “جاقسىلاپ ورنالاستىرىپ بەرەمىن” دەپ بيلياردقا شاقىراتىن. “ادەبيەت – اردىڭ ءىسى” دەگەنگە تويىپ العان ارمانشىل ستۋدەنت قىزدار “قوي, ول ەل بىلەتىن, ەل سىيلايتىن اقىن اعا عوي” دەپ بوتەن ويعا بارماستان شاقىرعان جەرىنە جەتىپ بارىپ, جاعاسىن ۇستاپ كەلەتىن. ايتقان ورىنىن ىزدەپ اداسىپ تابا الماي, دەر كەزىندە ەس جيعاندارى دا بار. وسى سەكىلدى تالاي وقيعادان سوڭ ادەبيەتتەن جەرىنىپ كەتكەنى قانشا?  – دەپ تۇيىندەدى جۋرناليست.

اقىن اتاۋلىنىڭ ءبارى ازعىن دەپ وتىرعانىم جوق, مەن جاي ءوزىم بىلەتىندى جازدىم. ايتپەسە سولاردىڭ ءبىرازىن ءالى كۇنگە اسپەتتەپ, ءدال وسى فەيسبۋكتە توبەگە كوتەرىپ وتىر. كۇندەردىڭ ءبىر كۇنى ءبىر قىز شىعىپ ءدال الگى ءانارۋدىڭ اڭگىمەسىن ايتسا تاڭعالمايمىن. ال سىزدەر ادەتتەگىدەي قىزدى كىنالاپ, جۇرت الدىندا جۇرگەندى جاقتاپ شىعاسىزدار.

ەل نازارىن اۋدارۋ ءۇشىن, باسقا ءۇشىن دەسەڭىز دە, ەكى ادام اراسىنداعى وسى ءبىر جاعداي قوعامنىڭ ءىرىڭىن كورسەتتى. رينات زايىتوۆتىڭ “سەكسەن پايىزىن” ءبىراز سىناپ ەدىڭىزدەر, ەندى كەپ الگى باتىرىمىز قاجىلىققا بارعان, ايەلى ورانعان دەپ يمانىن العا تارتا قاپسىزدار. بۇگىندە مەككەگە قاجىلىققا باردىم مەن انتالياعا دەمالۋعا باردىم دەپ ەشكىمدى تاڭعالدىرا المايسىز. ەكىنىڭ ءبىرى الەمنىڭ تۇكپىر-تۇكپىرىن ارالاپ ءجۇر. قازىر شەكارا اسۋ ءۇشىن قىرۋار قارجىنىڭ دا قاجەتى جوق. 24 ايعا ءبولىپ تولەۋ دەگەنىڭىز بۇ جاققا دا جەتكەن. ەل-جەر كەزىپ, ەكى جىل بويى تولەپ جۇرە بەر. سوندىقتان سىرت كوزگە ءدىن ۇستانعان بوپ كورىنەتىندەردى پەرىشتە ساناۋدى قويعان ءجون. سىرت كيىمدە ەمەس, بالەنىڭ ءبارى ىشتە. جۇرەكتە, سانادا.

تۇرمىستىق زورلىق-زومبىلىققا قارسى زاڭ ءانى-ءمىنى دەپ جۇرگەندە ادام ولىمىمەن, ۋ-شۋمەن قابىلداندى. حارراسمەنتكە قارسى زاڭ, ارتىنان اڭدۋعا (ستالكەرستۆو) قارسى زاڭ قابىلدانادى ءتۇبى. مىنە, اۋزىمەن وراق ورعان جاڭقوشتارىڭ سول كەزدە ساباسىنا كەلەدى.

ال “اشىنا بولىپ الىپ ەندى مىناسى نەسى” دەيتىن جۇرت اشىنا بولعان قىز ايىپتى دا, اشىنا ۇستاعان ەركەك جازىقسىز با سوندا?.. انا زاڭ, مىنا زاڭ ۇنامايدى ەكەن, “قاتىن باسقا شىققان ەكەن, پسيحولوگ-كوۋچتارىڭ ەلدى قۇرتقان ەكەن”, ەندەشە ساۋاتتى, ارلى ۇل تاربيەلە.

انا ايەلدەن مىنا ايەلگە ءارى-بەرى ءجۇرىپ, اليمەنتتەن قاشىپ-پىسىپ, ەتەگى قىسقا, شاشى اشىق قىز كورسە ناپسىسىنە يە بولا المايتىن السىزدىگىن “ورانىڭدار” دەگەن جەلەۋمەن ەمەس, ءوزىنىڭ ەرىك-جىگەرىمەن جەڭەتىن جاۋاپكەرشىلىكتى ۇل شىقپاي, ءبارى بەكەر, -دەپ جازدى اۆتور.