Jaınagúl Hamıdolla: Ánarýdy jaqsy túsinemin, ataǵy dardaı aqyndar bizdi de ońasha kezdesýlerge shaqyratyn

Biz de bes tıynymyzdy qystyra keteıik.

Áýeli, Ánarý degen atyn estigende “qandaı erekshe, ádemi esim” dep oılaǵam. Sóıtsek anasy aqyn, ákesi sazger eken. Ata-anasynyń qarym-qatynasyn, ákesiniń aıtqandaryn qazbalamaı turyp, fılfakta oqyǵan, ájeptáýir óleń shyǵaryp qoıatyn qurby qyzdary bar adam retinde mynaǵan toqtalaıyn:

Ánarýdyń áńgimesi tanys. О́ıtkeni ózimiz de Astanada oqydyq, aqyn-jazýshy, zııaly qaýym so jaqta kóbirek degendeı. Birimiz óleń shyǵaryp, birimiz jata-jastana óleń oqyp, arman qýyp bas qalaǵa oqýǵa bardyq. Nebir “zııalynyń” el aldynda aıtyp júrgeninen múlde bólek jeke áńgimesin de estidik. Atamyzben jasty, ataǵy dardaı aqyndar “daýysyń jaqsy eken, radıoǵa jumysqa ornalastyryp beremin, kofe isheıik” degen syltaýmen ońasha kezdesýlerge shaqyratyn. “Almatydan dos jigit kelip edi, sen de qurbyńdy erte kel, taksı aqysyn ózim tóleımin” dep meıramhanalardyń meken-jaıyn jiberetin. “Aqyndar bop otyrmyz” dep jap-jas qyzdardy páterge aldyrǵandary da boldy. Túngi klýbta kezdesetin. EUÝ-da jylda jataqhana jyry bastalatyndyqtan “jaqsylap ornalastyryp beremin” dep bılıardqa shaqyratyn. “Ádebıet – ardyń isi” degenge toıyp alǵan armanshyl stýdent qyzdar “qoı, ol el biletin, el syılaıtyn aqyn aǵa ǵoı” dep bóten oıǵa barmastan shaqyrǵan jerine jetip baryp, jaǵasyn ustap keletin. Aıtqan orynyn izdep adasyp taba almaı, der kezinde es jıǵandary da bar. Osy sekildi talaı oqıǵadan soń ádebıetten jerinip ketkeni qansha?  – dep túıindedi jýrnalıst.

Aqyn ataýlynyń bári azǵyn dep otyrǵanym joq, men jaı ózim biletindi jazdym. Áıtpese solardyń birazyn áli kúnge áspettep, dál osy feısbýkte tóbege kóterip otyr. Kúnderdiń bir kúni bir qyz shyǵyp dál álgi Ánarýdyń áńgimesin aıtsa tańǵalmaımyn. Al sizder ádettegideı qyzdy kinalap, jurt aldynda júrgendi jaqtap shyǵasyzdar.

El nazaryn aýdarý úshin, basqa úshin deseńiz de, eki adam arasyndaǵy osy bir jaǵdaı qoǵamnyń irińin kórsetti. Rınat Zaıytovtyń “seksen paıyzyn” biraz synap edińizder, endi kep álgi batyrymyz qajylyqqa barǵan, áıeli oranǵan dep ımanyn alǵa tarta qapsyzdar. Búginde Mekkege qajylyqqa bardym men Antalıaǵa demalýǵa bardym dep eshkimdi tańǵaldyra almaısyz. Ekiniń biri álemniń túkpir-túkpirin aralap júr. Qazir shekara asý úshin qyrýar qarjynyń da qajeti joq. 24 aıǵa bólip tóleý degenińiz bu jaqqa da jetken. El-jer kezip, eki jyl boıy tólep júre ber. Sondyqtan syrt kózge din ustanǵan bop kórinetinderdi perishte sanaýdy qoıǵan jón. Syrt kıimde emes, báleniń bári ishte. Júrekte, sanada.

Turmystyq zorlyq-zombylyqqa qarsy zań áni-mini dep júrgende adam ólimimen, ý-shýmen qabyldandy. Harrasmentke qarsy zań, artynan ańdýǵa (stalkerstvo) qarsy zań qabyldanady túbi. Mine, aýzymen oraq orǵan Jańqoshtaryń sol kezde sabasyna keledi.

Al “ashyna bolyp alyp endi mynasy nesi” deıtin jurt ashyna bolǵan qyz aıypty da, ashyna ustaǵan erkek jazyqsyz ba sonda?.. Ana zań, myna zań unamaıdy eken, “qatyn basqa shyqqan eken, psıholog-koýchtaryń eldi qurtqan eken”, endeshe saýatty, arly ul tárbıele.

Ana áıelden myna áıelge ári-beri júrip, alımentten qashyp-pysyp, etegi qysqa, shashy ashyq qyz kórse nápsisine ıe bola almaıtyn álsizdigin “oranyńdar” degen jeleýmen emes, óziniń erik-jigerimen jeńetin jaýapkershilikti ul shyqpaı, bári beker, -dep jazdy avtor.