جايىقتان ون ءبىر ەلدى مەكەنگە قاۋىپ ءتوندى

باتىس قازاقستان وبلىسىندا 11 اۋىلعا جايىقتان قاتەر ءتونىپ تۇر. بۇل ەلدى مەكەندەر سۋ باسۋ قاۋپى بار اۋماقتاردا ورنالاسقان.

توتەنشە جاعدايلار مينيسترلىگى ءار اۋىلدى ارالاپ, ءۇيىندى بوگەتتەردىڭ جاي-كۇيىن تەكسەردى. شىڭعىس ءارىنوۆ ءبورلى, يانۆارتسەۆو, رۋبەجينسكوە, وزەرنوە, ۆولودارسكوە, بايقونىس, جايىق جانە باسقا دا ەلدى مەكەندەردە بولدى. سۋ تاسقىنى باستالعاننان بەرى وڭىردە 100 شاقىرىمنان استام قورعانىس بوگەتتەرى سالىندى. ولجاس ابدراحمان, بقو بايتەرەك اۋدانى توتەنشە جاعدايلار ءبولىمىنىڭ باستىعى: — قازىرگى ۋاقىتتا گيدرومەتتىك كورسەتكىش بويىنشا 9 مەتر دەڭگەيدە تۇر جايىق وزەنىنىڭ دەڭگەيى. بۇل جاعالاۋدى كۇشەيتۋ جۇمىستارى وسى جىلدىڭ ناۋرىز ايىنىڭ اياعىنان باستاپ جۇرگىزىلدى. قازىرگى كۇنگە دەيىن جالعاستىرۋدا. ءبىزدىڭ جىگىتتەر كۇنى ءتۇنى كەزەكشىلىكتە. قاي جەردە قاۋىپ بار, سول جەردەن ءبارىن قاراپ جۇمىسقا جۇمىلدىرىلادى.