«جاقسىنىڭ جاقسىلىعىن ايت»: توقاەۆ نازارباەۆتىڭ ەڭبەگىن ۇمىتپاۋعا شاقىردى

فوتو: Reuters

مەملەكەت باسشىسى قاسىم-جومارت توقاەۆ اباي اتىنداعى ادەبيەت پەن ونەر سالاسىنداعى 2024 جىلعى مەملەكەتتىك سىيلىعىن تابىستاۋ بارىسىندا ءسوز سويلەپ, نازارباەۆتىڭ ەڭبەگىنە توقتالدى. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

ول رەسپۋبليكا كۇنىنە وراي تۇڭعىش پرەزيدەنت نۇرسۇلتان نازارباەۆتى اتاپ ءوتتى. سوزىنشە, قازىرگى قازاق مەملەكەتىن قۇرۋ ىسىندە نازارباەۆ شەشۋشى تاريحي ءرول اتقارعان. ول تۇڭعىش پرەزيدەنتتىڭ ەل ءۇشىن جاساعان قىزمەتىن ۇمىتپاۋعا شاقىردى.

“ەل ءۇشىن جاسالعان قىزمەت ەشقاشان ۇمىتىلماۋى كەرەك, ەل جادىندا ساقتالۋعا ءتيىس. بۇل – ەلىمىزدىڭ بولاشاعى ءۇشىن وتە ماڭىزدى. «جاقسىنىڭ جاقسىلىعىن ايت» دەگەن حالقىمىز. بۇگىنگى تاريحقا ءادىل باعا بەرىلۋى ءۇشىن كەشەگى تاريح ءادىل باعالانۋعا ءتيىس”, – دەدى پرەزيدەنت.

سونداي-اق قوعامدىق ءتارتىپ ماسەلەسىنە توقتالدى. توقاەۆتىڭ سوزىنشە, بەيبىتشىلىك پەن دامۋدىڭ ءتۇپ نەگىزى وتباسىنداعى تاربيەدەن, كوشەدەگى تازالىقتان, قوعامداعى بىرلىكتەن باستاۋ الادى. ول ەلدە زاڭ مەن ءتارتىپ ۇستەم تۇراتىنىن ءتۇسىندىردى.

“بۇل – ءبىزدىڭ اينىماس قاعيداتىمىز. ول قوعامدىق سانادا تامىر جايۋعا ءتيىس. زاڭ ازاماتتاردىڭ قۇقىقتارى مەن بوستاندىقتارىن قورعاپ, قوعامداعى ءتارتىپتى قامتاماسىز ەتۋ ءۇشىن قاجەت. ارينە, زاڭنىڭ قاتاڭدىعىنا نارازىلىق ءبىلدىرىپ, «قىلبۇراۋ سالىپ جاتىر» دەپ ويلايتىن ادامدار تابىلادى. بىراق جازادان جالتارىپ, جۇگەنسىز كەتكەندەر – حالىق پەن ەل مۇددەسىنە قارسى ادامدار. مەملەكەت قىلمىسقا «مۇلدەم توزبەۋشىلىك» قاعيداتىن ىسكە اسىرۋ ءۇشىن شارا قابىلداۋدى جالعاستىرادى. بۇزاقىلىقپەن جانە ۇيىمداسقان قىلمىسپەن كۇرەسەدى” – دەدى قاسىم-جومارت توقاەۆ.

پرەزيدەنت بىرلىگى مىقتى ەل بولساق, كوك پاسپورت مىقتى ءارى قۋاتتى بولاتىنىن ايتتى.

ء“بىر-بىرىمىزگە تىلەكتەس بولايىق, ءوزارا قۇرمەتپەن قارايىق, قادىرلەيىك. كەز كەلگەن قيىندىققا قارسى تۇرىپ, ەل ءۇشىن, جەر ءۇشىن بىرگە ەڭبەك ەتەيىك. حالقى – ءبىرتۇتاس, بولاشاعى – جارقىن ادىلەتتى قازاقستاندى بىرگە قۇرايىق. ازاماتتارىمىز بارلىق سالادا ءاردايىم ادىلدىك بولعانىن قالايدى. ول ءۇشىن اركىم ادىلدىكتى, ەڭ الدىمەن, وزىنەن باستاۋى كەرەك. سوندا قوعام دا, بۇكىل مەملەكەتتىك جۇيە دە ءادىل بولماق”, – دەدى ەل باسشىسى.

بۇعان دەيىن توقاەۆتىڭ بىرقاتار ونەر قايراتكەرلەرىن مەملەكەتتىك ناگرادالارمەن ماراپاتتاعانى ايتىلدى.