«Jaqsynyń jaqsylyǵyn aıt»: Toqaev Nazarbaevtyń eńbegin umytpaýǵa shaqyrdy

Foto: Reuters

Memleket basshysy Qasym-Jomart Toqaev Abaı atyndaǵy ádebıet pen óner salasyndaǵy 2024 jylǵy memlekettik syılyǵyn tabystaý barysynda sóz sóılep, Nazarbaevtyń eńbegine toqtaldy. Bul týraly qandastar.kz Stan.kz aqparat agenttigine silteme jasap habarlaıdy.

Ol Respýblıka kúnine oraı tuńǵysh prezıdent Nursultan Nazarbaevty atap ótti. Sózinshe, qazirgi Qazaq memleketin qurý isinde Nazarbaev sheshýshi tarıhı ról atqarǵan. Ol tuńǵysh prezıdenttiń el úshin jasaǵan qyzmetin umytpaýǵa shaqyrdy.

“El úshin jasalǵan qyzmet eshqashan umytylmaýy kerek, el jadynda saqtalýǵa tıis. Bul – elimizdiń bolashaǵy úshin óte mańyzdy. «Jaqsynyń jaqsylyǵyn aıt» degen halqymyz. Búgingi tarıhqa ádil baǵa berilýi úshin keshegi tarıh ádil baǵalanýǵa tıis”, – dedi prezıdent.

Sondaı-aq qoǵamdyq tártip máselesine toqtaldy. Toqaevtyń sózinshe, beıbitshilik pen damýdyń túp negizi otbasyndaǵy tárbıeden, kóshedegi tazalyqtan, qoǵamdaǵy birlikten bastaý alady. Ol elde zań men tártip ústem turatynyn túsindirdi.

“Bul – bizdiń aınymas qaǵıdatymyz. Ol qoǵamdyq sanada tamyr jaıýǵa tıis. Zań azamattardyń quqyqtary men bostandyqtaryn qorǵap, qoǵamdaǵy tártipti qamtamasyz etý úshin qajet. Árıne, zańnyń qatańdyǵyna narazylyq bildirip, «qylburaý salyp jatyr» dep oılaıtyn adamdar tabylady. Biraq jazadan jaltaryp, júgensiz ketkender – halyq pen el múddesine qarsy adamdar. Memleket qylmysqa «múldem tózbeýshilik» qaǵıdatyn iske asyrý úshin shara qabyldaýdy jalǵastyrady. Buzaqylyqpen jáne uıymdasqan qylmyspen kúresedi” – dedi Qasym-Jomart Toqaev.

Prezıdent birligi myqty el bolsaq, kók pasport myqty ári qýatty bolatynyn aıtty.

“Bir-birimizge tilektes bolaıyq, ózara qurmetpen qaraıyq, qadirleıik. Kez kelgen qıyndyqqa qarsy turyp, el úshin, jer úshin birge eńbek eteıik. Halqy – birtutas, bolashaǵy – jarqyn Ádiletti Qazaqstandy birge quraıyq. Azamattarymyz barlyq salada árdaıym ádildik bolǵanyn qalaıdy. Ol úshin árkim ádildikti, eń aldymen, ózinen bastaýy kerek. Sonda qoǵam da, búkil memlekettik júıe de ádil bolmaq”, – dedi el basshysy.

Buǵan deıin Toqaevtyń birqatar óner qaıratkerlerin memlekettik nagradalarmen marapattaǵany aıtyldy.