جاڭالىقتار
جاقىپوۆا كوپبالالى ەمەس وتباسىلارعا دا كومەك بەرىلەتىنىن ايتتى
فوتو: gov.kz
ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا كەيبىر كوپبالالى وتباسىلارعا قولداۋ توقتاتىلادى دەگەن سوزىنە قاتىستى تۇسىنىكتەمە بەردى, دەپ جازدى qandastar.kz
بۇل تۋرالى Stan.kz اقپارات اگەنتتىگى حابارلايدى.
«الدىمەن بۇل دۇنيەنى ىسكە اسىرۋ ءۇشىن قولدانىستاعى زاڭناماعا وزگەرىستەر ەنگىزۋ كەرەك. 1 قاراشاعا دەيىن الەۋمەتتىك كودەكسكە وزگەرىستەردى مەملەكەتتىك ورگاندارعا ەنگىزۋ كەرەك. قازىر بۇل جۇمىس جۇرگىزىلىپ جاتىر. بىرقاتار مينيسترلىك بىزگە قولداۋ كورسەتىپ وتىر. جىلدىڭ سوڭىنا دەيىن وزگەرىستەردى زاڭنىڭ شەڭبەرىندە شەشۋىمىز كەرەك», – دەدى جاقىپوۆا بريفينگتە.
جۋرناليست وسى وزگەرىستەر قابىلدانعان سوڭ جاعدايى بار وتباسىلار مەملەكەتتەن قانداي كومەكتى الا المايتىنىن ايتا الاسىز با دەپ سۇرادى.
«كونتسەپتسيانى بۇعان دەيىن دە ايتتىق. ساناتىنا عانا قاراپ ەمەس, كومەكتى وتباسىلار مۇقتاجدىق بويىنشا الۋ كەرەك. مىسالى, ادام ءتورت اي بويى اۋىرسا, وتباسىندا كىرىس بولماسا, ونىڭ ءۇش بالاسى بولسا, مەملەكەتتەن كومەك الا المايدى. بىراق ول مۇقتاج. سوندىقتان, ءبىز كوپبالالى ەمەس بولعانىنا قاراماي, مۇقتاج وتباسىلارعا جاردەماقى بەرۋدى قاراستىرىپ جاتىرمىز.تەك كوپبالالى وتباسىلار ەمەس, باسقا ساناتتاعىلارعا دا كومەك پەن قولداۋ كەرەك», – دەدى مينيستر.
ەسكە سالساق, بۇعان دەيىن كەيبىر كوپبالالى وتباسىلارعا مەملەكەتتەن جاردەماقى بەرۋ توقتاتىلاتىنى تۋرالى جازعان ەدىك. سونداي-اق مينيستر كوپبالالى وتباسىلارعا جاردەماقى بەرۋ توقتاتىلاتىنى تۋرالى اقپاراتقا جاۋاپ بەرگەن ەدى.
