الەۋمەت جانە قوعام
«جالاقىسى 40 مىڭ تەڭگە»: ءتورت بالاسى بار پوشتاشىعا اكىمدىكتە ساۋدا جاساۋعا رۇقسات بەرگەنى ءۇشىن جازالانعان اكىم ءمان-جايدى ءتۇسىندىردى
بوتاگوز سابيروۆا. فوتو: gov.kz
سولتۇستىك قازاقستان وبلىسىندا كوپبالالى پوشتاشى ايەلگە اكىمدىك عيماراتىندا ش ۇلىق ساتۋعا رۇقسات بەرگەن اۋىلدىق وكرۋگ اكىمى تارتىپتىك جاۋاپكەرشىلىككە تارتىلدى. اكىم بوتاگوز سابيروۆا ءمان-جايدى ايتىپ بەردى, دەپ جازدى qandastar.kz
بۇل تۋرالى Stan.kz اقپارات اگەنتتىگى Tengrinews.kzسايتىنا سىلتەمە جاساپ حابارلايدى.
جەرگىلىكتى پروكۋراتۋرانىڭ مالىمەتىنشە, پوشتاشى ايەل بالالار كيىمدەرىن, ش ۇلىقتارىن جانە ءىش كيىمدەرىن ءدال بوستاندىق اۋىلى اكىمدىگىنىڭ عيماراتىندا ساتقان. بۇعان قوسا اكىمدىك عيماراتىندا كىتاپحانا, ۋچاسكەلىك پوليتسيا قىزمەتكەرىنىڭ, مال دارىگەرى مەن پوشتاشىنىڭ كابينەتتەرى ورنالاسقان. اكىمشىلىك عيماراتتا ساۋدا جاساۋ زاڭ بۇزۋشىلىق دەپ تانىلدى. سولتۇستىك قازاقستان وبلىسى بويىنشا ادەپ جونىندەگى كەڭەس حاتشىلىعى وتىرىسىنىڭ قورىتىندىسى بويىنشا اكىمگە ەسكەرتۋ بەرىلدى. ال اكىمدىكتە ساۋدا جاساعان كوپبالالى انا اكىمشىلىك جاۋاپكەرشىلىككە تارتىلىپ, 58 980 تەڭگە ايىپپۇل ارقالاعان.
«مەنىڭ بىلۋىمشە, «قازپوشتادا» پوشتاشىنىڭ جالاقى مولشەرلەمەسى 0,25 بولدى, ياعني ايىنا 40 مىڭ تەڭگە. مۇنداي اقشاعا ءومىر ءسۇرۋ وتە قيىن. ونىڭ ءتورت بالاسى بار, ولاردى تاماقتاندىرۋ وڭاي ەمەس. ءوزىم دە جالعىزباستى انامىن, ءۇش بالا تاربيەلەپ وتىرمىن. ونىڭ جاعدايىن جاقسى تۇسىنەمىن. پوشتاشىنىڭ كۇيەۋى مەحانيزاتور بولىپ جۇمىس ىستەيدى. قازىر ول 49 جاستا», – دەدى اقجار اۋدانى كىشىقاروي اۋىلدىق وكرۋگى اكىمى بوتاگوز سابيروۆا.
ول ەكى اۋىلدا 750 ادام تۇراتىنىن ايتىپ ءوتتى.
«بارلىعىن تانيمىن. اكىم بولىپ جۇمىس ىستەگەنىمە التى اي عانا بولدى. پوشتاشى ەندى عيماراتتا ساۋدا جاسامايدى, ءبىز وعان كومەكتەسۋدىڭ زاڭدى جولدارىن قاراستىرامىز. مەنىڭ جۇمىسىم – ادامدارعا قامقورلىق جاساۋ, ولاردىڭ ماسەلەلەرىن ءبىلۋ», – دەدى ول.
بوتاگوز سابيروۆانىڭ ءوزى ءۇش بالا تاربيەلەپ وتىر: ءبىر ۇل, ەكى قىزى بار. ولاردىڭ بارلىعى بوستاندىق اۋىلىنداعى جەرگىلىكتى مەكتەپتە وقيدى. كۇيەۋىنەن 8 جىل بۇرىن اجىراسىپ كەتكەن.
ەسكە سالساق, بۇعان دەيىن سقو-دا اۋىلدىق وكرۋگتىڭ اكىمى پوشتاشى بولىپ جۇمىس ىستەيتىن كوپبالالى ايەلگە اكىمدىك عيماراتىندا ىشكيىم مەن ش ۇلىق ساتۋعا رۇقسات بەرگەنى ءۇشىن تارتىپتىك جاۋاپكەرشىلىككە تارتىلعانىن جازعان ەدىك.
