«جالعىز ۇلىمدى اسكەرگە اتتاندىرىپ, ۇيىمە ءمايىتى كەلدى» – قورعانىس مينيسترىنە ۇندەۋ

فوتو: اشىق دەرەككوز

ماڭعىستاۋ وبلىسىنداعى «ويماشا» پوليگونىندا بايقاۋسىزدا وق ءتيىپ, كوز جۇمعان ساربازدىڭ اكەسى بالاسىنىڭ ابايسىزدا ءولىم قۇشقانىنا سەنبەيدى, دەپ حابارلايدى Ulysmedia.kz.

اكە ۇندەۋى

ماڭعىستاۋ وبلىسىندا ۇلىنىڭ ولىمىنە قاتىستى بولعان قايعىلى جاعدايدان سوڭ ساربازدىڭ اكەسى الەۋمەتتىك جەلىگە ۆيدەو ۇندەۋ جولدادى.

مينيسترگە تالاپ

ول ەلىمىزدىڭ قورعانىس مينيسترىنە بۇل جاعدايدى ءوز باقىلاۋىنا الىپ, تەرگەۋدىڭ ءادىل ءجۇرۋىن قامتاماسىز ەتۋىن سۇرادى.

“بالامنىڭ بەتىنە تيگىن تاپانشادان شىققان وقتى بايقاۋسىزدا اتىلعان دەگەن قورىتىندى بەرىلگەن. مۇنى وقىس جاعداي دەپ وتىر. وفيتسەر تاپانشانى ەرمەك قىلىپ ويناعان. ءسويتىپ ول شۇرىپپەنى ابايسىزدا باسىپ العان. تاپانشا اتىلۋ ءۇشىن الدىمەن, ونى وقتاۋ كەرەك, سوسىن ساقتاندىرعىشتان شىعارىلۋى كەرەك ەمەس پە? ول قالاي بىردەن اتىلىپ كەتەدى”, دەگەن ساربازدىڭ اكەسى بۇل ىسكە قاتىسى بارلار ماسەلەنى وسىلاي جابا سالعىسى كەلىپ وتىرعانىنا اشۋلى.

“قازىر اقتاۋ قالاسىنداعى تەرگەۋ شارالارىنا جول ءجۇرىپ بارا جاتىرمىز. مەن ءىستىڭ ءمان-جايىن بۇگە-شىگەسىنە دەيىن انىقتاپ قاراعانىن تالاپ ەتەمىن”, دەگەن ول بالاسىنىڭ دەنەسىن كورۋگە مايىتحاناعا بارا جاتقانىن جەتكىزدى.

قالاي بولدى?

ەسكە سالا كەتسەك, بۇگىن ماڭعىستاۋ وبلىسىنداعى «ويماشا» پوليگونىندا ءبىر ساربازعا بايقاۋسىزدا وق ءتيىپ, كوز جۇمعانىن حابارلاعانبىز. قايعىلى وقيعا «باتىس» وڭىرلىك قولباسشىلىعى بولىمدەرىنىڭ جيىنى كەزىندە بولعان.

بەيرەسمي اقپاراتقا سايكەس, 17:10 شاماسىندا لاگەر بويىنشا كەزەكشى, گۆارديا لەيتينانتى پم 9 مم تاپانشاسىنان وق اتقان. اتىلعان وق قاتارداعى جاۋىنگەر مارات ەربول ۇلى بارقۇلوۆتىڭ بەتىنە تيگەن.

سارباز اۋرۋحاناعا جەتكىزىلگەنىمەن ونىڭ ءومىرىن اراشالاۋ مۇمكىن بولماعان. 17:40 شاماسىندا ەر ادام كوز جۇمدى.