مادەنيەت
«جالعىز ۇرپاعىن كوپ كورمەيمىز, ەستىمەيمىز»: ءلايلى سۇلتانقىزى مارقۇم باتىرحان شۇكەنوۆتىڭ اناسىنىڭ ارمانىن ايتتى
فوتو: https://www.instagram.com/sultankyzy/
تانىمال باق وكىلى, جۋرناليست ءلايلا سۇلتانقىزى مارقۇم باتىرحان شۇكەنوۆتى ەسىنە الدى. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.
مەديا مامانى Zamandas پودكاستىندا مارقۇم ءانشىنى سوڭعى رەت قاي جەردەن كورگەنىن ايتتى.
“ول كەزدە راديودا ىستەيمىن. قازاقشا سويلەپ, قازاقشا ەفير جۇرگىزەتىن ەدىم. ءبىر كۇنى قولىمدا كوپ ديسكىمەن نۇربەرگەن ماحامبەتوۆتىڭ كابينەتىنە كەلە جاتتىم. مەن ءالى كىشكەنتايمىن. سول جىلى بىزگە بەيبىت الىبەكوۆ مەكتەپ ءبىتىرىپ كەلىپ جاتقان. جۇگىرىپ كەلە جاتىپ قاراسام, نۇربەرگەننىڭ كابينەتىندە باتىر تۇر. باتىردى كورگەندە ءتىلىمدى جۇتىپ قويدىم. قولىمداعى ديسكىنىڭ ءبارىن قۇلاتىپ الدىم. سوندا ماعان قاراپ, «ەفيردە قازاق تىلىندە سويلەيتىن قىز با?» دەپ سۇرادى. ء«يا, مەن» دەدىم. كەيىنىرەك باتىر Superstar.kz جوباسىنا شاقىرعاندا قاتتى تاڭعالدىم. بالالىق ارمان ەدى عوي. سوندا باتىرعا قاراپ وتىرا بەرەتىنمىن. ول كۇشتى سويلەيتىن, كۇشتى اڭگىمەلەر ايتاتىن», – دەدى جۋرناليست.
سونىمەن قاتار مارقۇمنىڭ تۋىپ-وسكەن شاڭىراعىندا دا ءجيى قوناق بولاتىن كەزدى ايتىپ بەردى.
“قىزىلورداعا اكە-شەشەسىنىڭ ۇيىنە باردىق. مەن كىشكەنە قازاقشا سويلەيمىن, داۋدىراپ اڭگىمەمدى ايتا بەرەمىن عوي. سودان اناسى ء«اي, قىزىم, وتىر. سەن نەگە ءجۇرسىڭ? قارامايسىڭ با, باتىرعا عاشىق قازاق قىزدارى كوپ قوي, ءيا?» دەدى. سودان مەن ء«يا, باتىردى بارلىق قىز ونى ۇناتادى» دەپ جاتىرمىن. سوندا «سول بالام جاقسى كەلىنشەك السا دەگەن ارمانىم عوي» دەپ ارمانىن ايتتى. سول كەزدە باتىردىڭ اناسى ونىڭ ءبىر قازاق قىزىنا ۇيلەنگەنى, ءۇبىرلى-ءشۇبىرلى, بالالى-شاعالى بولعانىن قالاعانىن ءتۇسىندىم. 2006 جىلى ما ەكەن, 25 قازاندا تويعا شاقىردى. قازاق قىزعا ۇيلەندى. ءبارىمىز قاتتى قۋاندىق. «باتىرحاندى قايتىس بولارىنىڭ الدىندا 1-2 اي بۇرىن كوردىم. «قازمەديادا» ەدىم, Rixos-قا شاي ىشۋگە شاقىردى. قاسىندا ۇيىمداستىرۋشى ايەل بولدى. نەگە شاقىرعانىن سۇراسام, «جاي سويلەسەيىن دەگەنمىن, بوپەلەرىڭ قالاي» دەدى. سودان «ۇيگە ءجۇرىڭىز, شاي ءىشىڭىز» دەپ ەم, «جوق, مەن 1 كۇنگە كەلدىم, ءبارى جاقسى» دەپ كوپ اشىلا قويعان جوق. ارينە, وكىنىشكە قاراي, باتىردىڭ ارتىنان قالعان جالعىز ۇرپاعى ماقسۇتتى كوپ كورمەيمىز, ول تۋرالى كوپ ەستي دە بەرمەيمىز. كەيدە قازاقتىڭ سونداي مىقتى جىگىتتەرىنەن ۇرپاق كوپ قالعانى دۇرىس پا ەدى» –دەپ ويىن ءبولىستى باق وكىلى.
ەسكە سالايىق, ۇلتتىق بانك باتىرحان شۇكەنوۆتىڭ تۋعان كۇنىنە وراي كوللەكتسيالىق مونەتالار شىعارعان ەدى.
