«جامباسىندا ءتىستىڭ ءىزى قالعان»: 19 جاستاعى قىزدىڭ ولىمىنە قاتىستى دەرەك

قايعىلى وقيعا 30 ماۋسىم كۇنى بولعان. دۇكەندە ساتۋشى بولىپ جۇمىس ىستەيتىن قىز ادەتتەگىدەي اۋدان ورتالىعىنا كەتكەن. كەشكىسىن جۇمىستان شىققان سوڭ جىگىتى كۇتىپ الىپتى. الايدا 18:30-دار شاماسىندا سۇيىكتىسىنىڭ كولىگىنە وتىرعان ديلمۋرا ەرگينوۆا ۇيىنە سول كۇيى جەتە المادى,-دەپ حابارلايدى Qandastar.kz

ۇيىنە ۋاقىتىلى قايتپاعان قىزىن اتا-اناسى بىردەن ىزدەۋگە كوشكەن. سوزىنشە, بويجەتكەننىڭ مۇنداي ادەتى بولماعان. جان-جاقتىڭ ءبارىن شارلاعان جاقىندارى ديلمۋرامەن ءسوز بايلاسقان جىگىتىنىڭ دە تۋىستارىنا حابارلاسىپتى. ولار « ۇلىنىڭ ۇيدە ۇيىقتاپ جاتقانىن ايتىپ, داۋرىقپادى» دەيدى مارقۇمنىڭ وتباسى.

“مەن جىگىتتىڭ قارىنداسىنا حابارلاستىم. ول اعاسىنىڭ ۇيدە ۇيىقتاپ جاتقانىن ايتتى. ال اتا-اناسى تويدا بولعان ەكەن. بىزگە تەك ءتۇن ىشىندە حابارلادى. قىزىمىز سول ۇيدەگى گاراج ىشىندەگى كولىكتەن ءولى كۇيىندە وتىر ەكەن”,–دەيدى مارقۇمنىڭ تۋعان اپكەسى.

اكەسى سول كۇنى قىزىنا قايتا-قايتا قوڭىراۋ شالىپ, بىردە-ءبىر جاۋاپ الماعانىن ايتتى.

“قىزىمدا ۇيالى تەلەفونىن الماي قويۋ, حابارلاماعا جاۋاپ بەرمەۋ دەگەن ادەت ەشقاشان بولماعان. سودان سەكەم الدىق. 6 ساعات بويى سمارتفونىنا حابارلاستىق. ەكى نومىرىنە دە قوڭىراۋ بارىپ تۇردى. بىراق تۇتقانى المايدى. سوڭىندا كورشى اۋىلداعى ۇيدەن تابىلعانىن حابارلادى. بارساق, ەسىك الدىندا پوليتسيا دا, جەدەل-جاردەم دە تۇر ەكەن. ال قىزىم قايتىس بولىپتى. ول مەنىڭ كەنجەتايىم ەدى. ءبىر رەت تە قارسى سويلەپ, ۇرىسقان ەمەسپىن”,–دەيدى مارقۇمنىڭ اكەسى دانيار قۇرباناليەۆ.

سودان بەرى ەس جيا الماي جۇرگەن وتباسىعا قىزىنىڭ ءيىس ءتيىپ جان تاپسىرعانىن ەستىرتىپتى. وعان دا كوندىك دەگەن قارالى جانۇيا بار سۇمدىق دەنەنى ءمايىتحانادان الىپ كەلگەن سوڭ باستالعانىن ايتادى. سوزدەرىنشە مارقۇمنىڭ دەنەسى كوگەرىپ, بەت-اۋزىنىڭ ءبارى قان بولعان.

“مەن ءمايىتتى جۋعا كىردىم. كۋاگەرمىن. اۋزىنا قان تولىپ قالعان ەكەن. ماڭدايى دا, بەتى دە ءىسىپ كەتكەن. جامباسىندا ءتىستىڭ ءىزى تۇر. قولى دا, مۇرنى دا سىنعان. ءسىڭىلىمىز ارىن ساقتاۋ ءۇشىن جانتالاسقان سياقتى”, – دەيدى مارقۇمنىڭ اپكەسى مالاحات قۇرباناليەۆا.

وسىلاي دەگەن ديلمۋرانىڭ وتباسى ەكى رەت ساراپتاما جاسالعانىن ايتادى. ەكەۋىنىڭ دە ناتيجەسىندە قىز ءيىس ءتيىپ جان تاپسىرعانى انىقتالىپتى. وسىعان سەنبەگەن قۇرباناليەۆتەر قايتادان ساراپتاما جاساتتىق دەيدى. ازىرگە قورىتىندى بەلگىسىز ەكەنىن جەتكىزدى.

ستۋدەنت قىزدىڭ جۇمباق ولىمىنە كۇدىكتى دە تابىلدى. ول 19 جاستاعى كورشى اۋىلدىڭ تۇرعىنى. مارقۇممەن ءبىر جىلدان بەرى ءسوز بايلاسىپ جۇرگەن جىگىت وعان ۇيلەنۋدى دە جوسپارلاعان دەيدى. بىراق نەگە ەكەنى بەلگىسىز سۇيىكتىسىنىڭ ولىمىنە قاتىستى كۇدىكتى رەتىندە تۇتقىنعا الىندى.

“اسا اۋىر قىلمىس جاسادى دەگەن كۇدىكتى ۇستالىپ, ۋاقىتشا ۇستاۋ يزولياتورىنا قاماۋعا الىندى. قىلمىستىق ءىس قوزعالدى. بارلىق قاجەتتى ساراپتامالار تاعايىندالدى. بولعان وقيعانىڭ تولىق ءمان-جايى انىقتالۋدا”, – دەيدى تۇركىستان وبلىسىنىڭ پوليتسيا دەپارتامەنتى.

وسىلايشا بيىل ۇزاتىلعالى وتىرعان تۇركىستان وبلىسى, سايرام اۋدانىنىڭ 19 جاستاعى تۇرعىنى جەر قوينىنا تاپسىرىلدى. ديلمۋرا ەرگينوۆانىڭ ولىمىنە نە سەبەپ بولعانى تەرگەپ-تەكسەرۋ جۇمىستارىنان كەيىن ءبىر-اق بەلگىلى بولماق.

ايتا كەتكەن ءجون, بۇعان دەيىن تۇركىستان وبلىسى سايرام اۋدانى اقسۋكەنت اۋىلىندا 19 جاستاعى جىگىت سۇيىكتىسىن ءولتىرىپ, دەنەسىن كولىكجايدا التى ساعات ساقتادى دەگەن اقپارات تاراعان ەدى