جامبىل وبلىستىق پد باستىعى قىزمەتكەرىنە بالاعات ءسوز ايتقانى ءۇشىن قىزمەتىنەن بوساتىلدى

فوتو: جامبىل وبلىسى پد

وندا ونىڭ قاراماعىنداعى قىزمەتكەرگە بوعاۋىز ءسوز ايتىپ, تىلدەگەنى تۇسىرىلگەن. اتالعان ۆيدەوعا بايلانىستى دەپارتامەنت باستىعى ارمانبەك بايمۋرزين قىزمەتىنەن بوساتىلدى.

«جامبىل وبلىسى ءىىد باستىعىنىڭ قاتىسۋىمەن تۇسىرىلگەن بەينەروليكتىڭ نەگىزىندە ىشكى ىستەر ءمينيسترىنىڭ تاپسىرماسى بويىنشا قىزمەتتىك تەرگەۋ تاعايىندالدى. وبلىسقا ىشكى ىستەر مينيسترلىگىنىڭ كادر ساياساتى دەپارتامەنتىنىڭ باستىعى مەن ىشكى قاۋىپسىزدىك قىزمەتىنىڭ وكىلدەرى جولداندى. قىزمەتتىك تەرگەۋ كەزەڭىندە وبلىستىڭ پد باستىعى ا.بايمۋرزين قىزمەتىنەن بوساتىلدى», – دەپ حابارلادى قر ءىىم ءباسپاسوز قىزمەتى.

پوليتسيا گەنەرال-مايورى ارمانبەك حاكىمبەك ۇلى بايمۋرزين 1974 جىلدىڭ 3 ساۋىرىندە كوكشەتاۋ وبلىسىنىڭ ششۋچينسك قالاسىندا تۋىلعان. ءبىلىمى – جوعارى.

1992 جىلدىڭ تامىز ايىنان 1994 جىلدىڭ قىركۇيەك ايىنا دەيىن- قازاقستان رەسپۋبليكاسى ىشكى ىستەر مينيسترلىگىنىڭ قاراعاندى جوعارى مەكتەبىندە, 1994 جىلدىڭ قىركۇيەك ايىنان 1996 جىلدىڭ قاڭتار ايىنا دەيىن قازاقستان رەسپۋبليكاسى متك-ءنىڭ جوعارعى تەرگەۋ مەكتەبىندە وقىدى, ونى اياقتاعان سوڭ الماتى قالاسىنىڭ اۋەزوۆ اۋدانى بويىنشا متك باسقارماسىنىڭ تەرگەۋ بولىمشەسىنىڭ تەرگەۋشىسى بولىپ قىزمەت اتقاردى.

1997 جىلدان باستاپ ءىىو-نىڭ جەدەل قۇرامىندا ءارتۇرلى لاۋازىمداردا جۇمىس اتقاردى.

2004 جىلدىڭ اقپانىنان 2012 جىلدىڭ ساۋىرىنە دەيىن قر ءىىم كريمينالدىق پوليتسيا كوميتەتىندە ءارتۇرلى باسشىلىق لاۋازىمداردا قىزمەت ەتتى.

2012 جىلدىڭ ساۋىرىنەن 2014 جىلدىڭ قاراشاسىنا دەيىنگى ارالىقتا جامبىل وبلىسىنىڭ ىشكى ىستەر دەپارتامەنتى باستىعىنىڭ ءبىرىنشى ورىنباسارى قىزمەتىن اتقاردى.

2014 جىلدىڭ 24 قاراشاسىنان 2019 جىلدىڭ قازانىنا دەيىن – قازاقستان رەسپۋبليكاسىنىڭ ىشكى ىستەر مينيسترلىگى كريمينالدىق پوليتسيا دەپارتامەنتىنىڭ باستىعى.

2019 جىلدىڭ قازانىنان 2022 جىلدىڭ 9 اقپانىنا دەيىن – اقمولا وبلىسى پوليتسيا دەپارتامەنتىنىڭ باستىعى.

2022 جىلعى 10 اقپاننان باستاپ قازىرگى ۋاقىتقا دەيىن جامبىل وبلىسى پوليتسيا دەپارتامەنتىنىڭ باستىعى بولدى.