جامبىل وبلىسىندا ەسىرتكىگە قارسى كۇرەس ءبولىمىنىڭ باستىعى ماريحۋانا ساتقان

فوتو: polisia.kz

جامبىل وبلىسىندا ەسىرتكىگە قارسى كۇرەس ءبولىمىنىڭ باستىعى جۇمىستا ستاتيستيكانى جاساندى تۇردە كوتەرۋ ءۇشىن ماريحۋانا ساتقان. بۇل تۋرالى qandastar.kz Stan.kzاقپارات اگەنتتىگىنە سىلتەمە جاساپ حابارلايدى.

ءىس ماتەريالدارىنان بەلگىلى بولعانداي, سوتتالۋشى جامبىل وبلىسىنداعى جەلىلىك پوليتسيا ءبولىمىنىڭ ەسىرتكى قىلمىسىنا قارسى ءىس-قيمىل بولىمشەسىنىڭ باستىعى قىزمەتىن اتقارعان. ول تارازدان تانىس, بىرنەشە رەت سوتتالعان ادام ارقىلى ەسىرتكىنى باسقا وڭىرلەرگە وتكىزگەن.

«ەسىرتكى ارنالارىن انىقتاۋ, اشۋ جانە جولىن كەسۋ جونىندەگى جۇمىس كورسەتكىشتەرىن جاساندى تۇردە ارتتىرۋ ماقساتىندا 1080,03 گرامم (اسا ءىرى مولشەردە) سالماعى بار «كەپتىرىلگەن ماريحۋانا» ەسىرتكى قۇرالىن شش. ارقىلى باسقا وڭىرگە ودان ءارى وتكىزۋ جانە كەيىننەن ۇستاۋ ءۇشىن زاڭسىز ساتىپ العان», – دەلىنگەن اۋدانارالىق سوتتىڭ حابارلاماسىندا.

سوتتالۋشىنىڭ كىناسى دالەلدەندى, بىراق ول ونى مويىندامادى. جەڭىلدەتەتىن جاعداي رەتىندە سوت جاس بالالاردىڭ بولۋىن ەسكەردى. انتتى بۇزعانى اۋىرلاتاتىن فاكتور بولدى.

پوليتسيا مايورىنا 11 جىل باس بوستاندىعىنان ايىرۋ جازاسى تاعايىندالدى. ۇكىم زاڭدى كۇشىنە ەنگەن جوق.