جاڭالىقتار
جامبىل وبلىسىندا ۇلىن وقتاۋمەن ۇرعان ايەل 6 ايعا سوتتالدى
جامبىل وبلىسىندا وگەي ۇلىن وقتاۋمەن ۇرعان ايەلگە ۇكىم شىقتى. بۇل تۋرالى Qandastar.kz سايتى Stan.kz اقپارات اگەنتتىگىنە سىلتەمە جاساپ.
وڭىرلىك سوتتىڭ ءباسپاسوز قىزمەتىنىڭ مالىمەتىنشە, وقيعا بىلتىر جەلتوقسان ايىندا بولعان. ايەلدىڭ ءبىر ميلليون تەڭگەسى جوعالىپ كەتكەن. ول قاراجاتتى بالا ۇرلاپ الدى دەپ كۇدىكتەنىپ, اقشانى قايتارۋدى تالاپ ەتكەن. الايدا بالا اقشانى الماعانىن ايتادى. ارتىنشا ايەل ءجاسوسپىرىمدى اعاش وقتاۋمەن سوققىعا جىققان.
«كەلەسى كۇنى كوللەدج وقىتۋشىلارى بالانىڭ جاعدايىن كورىپ, ونى اۋرۋحاناعا اپارعان. ساراپتاما قورىتىندىسىنا سايكەس, كامەلەتكە تولماعان بالا جەڭىل جاراقات العان», – دەلىنگەن حابارلامادا.
سوت وتىرىسى بارىسىندا ايەل كىناسىن تولىق مويىندادى. وگەي ۇلى ونى كەشىرىپ, شاعىمى جوعىن ايتتى جانە سوتتالۋشىنى جازادان بوساتۋدى سۇرادى. الايدا ول ەندى ونىمەن بىرگە تۇرعىسى كەلمەيتىنىن جەتكىزدى.
«سوت كىنانى تولىق مويىنداۋىن, كامەلەتكە تولماعان بالاسىنىڭ بار ەكەنىن جەڭىلدەتەتىن جاعداي رەتىندە قاراستىردى. اۋىرلاتاتىن جاعدايلار انىقتالعان جوق. سوت ايەلدى كامەلەتكە تولماعانعا قاساقانا جەڭىل جاراقات كەلتىرگەنى ءۇشىن كىنالى دەپ تانىپ, 6 اي مەرزىمگە بوستاندىعىن شەكتەۋ جازاسىن تاعايىندادى», – دەپ حابارلادى سوتتان.
بۇدان بولەك, ايەلدىڭ مىنەز-قۇلقىنا قاتىستى ارنايى تالاپتار قويىلدى. وعان جابىرلەنۋشىنى ىزدەۋگە, قۋدالاۋعا, ۇيىنە بارۋعا, اۋىزشا جانە تەلەفون ارقىلى سويلەسۋگە, باسقا دا جولدارمەن بايلانىس ورناتۋعا ءۇش ايعا تىيىم سالىندى.
ۇكىم ءالى زاڭدى كۇشىنە ەنگەن جوق.
