Jambyl oblysynda ulyn oqtaýmen urǵan áıel 6 aıǵa sottaldy

Jambyl oblysynda ógeı ulyn oqtaýmen urǵan áıelge úkim shyqty. Bul týraly Qandastar.kz saıty Stan.kz aqparat agenttigine silteme jasap.

О́ńirlik sottyń baspasóz qyzmetiniń málimetinshe, oqıǵa byltyr jeltoqsan aıynda bolǵan. Áıeldiń bir mıllıon teńgesi joǵalyp ketken. Ol qarajatty bala urlap aldy dep kúdiktenip, aqshany qaıtarýdy talap etken. Alaıda bala aqshany almaǵanyn aıtady. Artynsha áıel jasóspirimdi aǵash oqtaýmen soqqyǵa jyqqan.

«Kelesi kúni kolledj oqytýshylary balanyń jaǵdaıyn kórip, ony aýrýhanaǵa aparǵan. Saraptama qorytyndysyna sáıkes, kámeletke tolmaǵan bala jeńil jaraqat alǵan», – delingen habarlamada.

Sot otyrysy barysynda áıel kinásin tolyq moıyndady. О́geı uly ony keshirip, shaǵymy joǵyn aıtty jáne sottalýshyny jazadan bosatýdy surady. Alaıda ol endi onymen birge turǵysy kelmeıtinin jetkizdi.

«Sot kináni tolyq moıyndaýyn, kámeletke tolmaǵan balasynyń bar ekenin jeńildetetin jaǵdaı retinde qarastyrdy. Aýyrlatatyn jaǵdaılar anyqtalǵan joq. Sot áıeldi kámeletke tolmaǵanǵa qasaqana jeńil jaraqat keltirgeni úshin kináli dep tanyp, 6 aı merzimge bostandyǵyn shekteý jazasyn taǵaıyndady», – dep habarlady sottan.

Budan bólek, áıeldiń minez-qulqyna qatysty arnaıy talaptar qoıyldy. Oǵan jábirlenýshini izdeýge, qýdalaýǵa, úıine barýǵa, aýyzsha jáne telefon arqyly sóılesýge, basqa da joldarmen baılanys ornatýǵa úsh aıǵa tyıym salyndy.

Úkim áli zańdy kúshine engen joq.