Jambyl oblysynda janaza namazyn shyǵarý úshin 100 myń teńge suraǵan

Jambyl oblysy Sarysý aýdanynda janaza namazyn shyǵarý úshin 100 myń teńge talap etildi degen aqparat qoǵamda úlken rezonans týdyrdy, dep habarlaıdy Qandastar.kz. 

Bul týraly alǵash bolyp aıtysker Alık Bekmýsaev áleýmettik jelide jazba jarııalaǵan. Onyń aıtýynsha, osyndaı soma marqumnyń týystarynan aýdanǵa qarasty aýyldardyń birinde suralǵan.

Málimet el ishinde qyzý talqylanyp, halyq narazylyǵyn týdyrǵan soń, máseleni Jambyl oblysy boıynsha Qazaqstan musylmandary dinı basqarmasynyń ókildigi nazarǵa aldy. Oblystyń bas ımamy Asqar Satyǵlanov bul jaǵdaıǵa qatysty resmı pikir bildirdi.

“Janazaǵa aqy belgileý — sharıǵatqa qaıshy. Resmı tirkelgen ımamdardyń eshqaısysy dinı rásim úshin aqy suraýǵa quqyly emes. Mundaı áreketter tergelýi tıis. Múmkin, buǵan qatysy bar adamdar múftııatpen baılanysy joq jekelegen tulǵalar bolýy yqtımal” — dedi ol.

Imamnyń bul málimdemesi meshit pen halyq arasyndaǵy senimdi saqtaý jolyndaǵy mańyzdy qadam retinde qabyldandy. Alaıda qoǵam áli de bul máselege naqty jaýap pen tıisti shara kútedi. Qazir Sarysý aýdanyndaǵy jaǵdaıdy jergilikti bılik pen dinı basqarma ókilderi birlesip zerttep jatyr. Resmı derek boıynsha, atalmysh eldi mekende qyzmet etetin ımamdardyń eshqaısysy janaza úshin aqy alý týraly nusqaýlyq almaǵan.