جامبىل وبلىسىندا جانتۇرشىگەرلىك جول اپاتىنان 7 ادام قازا تاپتى

فوتو: ۆيدەودان سكرين

جامبىل وبلىسىندا جول-كولىك اپاتى سالدارىنان 7 ادام, ونىڭ ىشىندە 2 بالا قازا تاپتى, دەپ حابارلايدى qandastar.kz  Skifnews.kz اقپارات پورتالىنا سىلتەمە جاساپ. 

بۇل تۋرالى جامبىل وبلىستىق پوليتسيا دەپارتامەنتىنىڭ ءباسپاسوز حاتشىسى گۇلسارا مۇحتارقۇلوۆا ايتتى.

«2024 جىلدىڭ 16 قىركۇيەگىندە ساعات 18:30 شاماسىندا «باتىس ەۋروپا – باتىس قىتاي» رەسپۋبليكالىق ماڭىزى بار اۆتوجولدىڭ 526 شاقىرىمىندا جول-كولىك وقيعاسى بولدى. Cadillac Escalade كولىگىنىڭ جۇرگىزۋشىسى الدىڭعى كولىكتى باسىپ وزىپ, قارسى باعىتقا شىعىپ كەتۋى سالدارىنان قاراما-قارسى كەلە جاتقان DAF جۇك كولىگىمەن سوقتىعىسىپ قالعان. سونىڭ سالدارىنان Cadillac Escalade قايتا ءوز جولاعىنا ءتۇسىپ, گازەل كولىگىنە قاعىلعان. جول اپاتىنان كەيىن ەكى كولىك تە بىردەن ورتەنىپ كەتتى. وقيعا ورنىندا 37 جاستاعى گازەل جۇرگىزۋشىسى مەن 30 جاستاعى Cadillac Escalade جۇرگىزۋشىسى جانە ونىڭ 5 جولاۋشىسى قازا تاپتى. ونىڭ ىشىندە ەكى بالا بار», – دەدى ول جامبىل وبلىستى پد-نىڭ Facebook پاراقشاسىندا جاريالانعان ۆيدەودا.

پد وكىلىنىڭ دەرەگىنشە, اتالعان دەرەككە قاتىستى سوتقا دەيىنگى تەرگەۋ امالدارى باستالدى.

«جامبىل وبلىستىق پوليتسيا دەپارتامەت جول ەرەجەسىن قاتاڭ ساقتاۋدى ەسكەرتەدى», – دەدى گۇلسارا مۇحتارقۇلوۆا.