جامبىل وبلىسىنداعى سۋ باسۋ: ايماق اكىمدىگى مالىمدەمە جاسادى

فوتو: azattyq-ruhy.kz

جامبىل وبلىستىق اكىمدىگى سارىسۋدا سۋ باسۋدان كەيىن ماتەريالدىق شىعىندى ەسەپتەۋ جۇمىستارى باستالعانىن مالىمدەدى. بۇل تۋرالى Stan.kz اقپارات اگەنتتىگى حابارلايدى.

قازىرگى تاڭدا شىعىندى زەردەلەۋ بويىنشا جۇمىس توپ قۇرىلعان. سونىمەن قاتار توتەنشە جاعدايلار دەپارتامەنتىنىڭ قىزمەتكەرلەرى سۋ سورۋ جۇمىستارىن جالعاستىرىپ جاتىر. بارلىعى 18 600 م3 سۋ سورىلىپ, جالپى 128 اۋلا مەن 47 ءۇيدىڭ ءىشى سۋدان تازارتىلدى.

“جاڭاتاس قالاسىنداعى ەكى ەلدى مەكەن (مالوەتاجكا, دەگەرەس) جارىققا قوسىلدى. تەك د. قوناەۆ ورتا مەكتەبىندە سۋدان تازارتۋ جۇمىستارىنىڭ جۇرگىزىلۋىنە بايلانىستى جارىق ءالى بەرىلمەدى. 8 شىلدە, تاڭەرتەڭ ۇشقىزسىز ۇشۋ اپپاراتىنىڭ كومەگىمەن سۋ دەڭگەيىنىڭ ەداۋىر تومەندەگەنى انىقتالدى. ادام, مال شىعىنى جوق. زارداپ شەككەن تۇرعىندار ءۇشىن 105 ورىندىق ەكى قابىلداۋ پۋنكتى دايىندىققا كەلتىرىلىپ, وعان 12 ادام ورنالىستىرىلدى. قازىر ولار ءوز ەرىكتەرىمەن ۇيلەرىنە قايتارىلدى”, – دەلىنگەن حابارلامادا.

«جاڭاتاس–ساۋداكەنت» تاسجولى اشىق. توتەنشە جاعدايدىڭ سالدارىن جويۋعا ازاماتتىق قورعاۋ قىزمەتتەرىنەن 282 ادام, 64 تەحنيكا, 35 موتوپومپا جانە 1 ۇشقىزسىز ۇشۋ اپپاراتى جۇمىلدىرىلعان.