جامبىل وبلىسىنىڭ ەكس-اكىمى كارىم كوكىرەكباەۆ 12 جىلعا سوتتالدى

جامبىل وبلىسىنىڭ بۇرىنعى اكىمى كارىم كوكىرەكباەۆ اسا ءىرى كولەمدە پارا العانى ءۇشىن 12 جىلعا سوتتالدى, دەپ حابارلايدى Qandastar.kz اقپارات پورتالى.

الماتى وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا القابيلەردىڭ قاتىسۋىمەن كارىم كوكىرەكباەۆ, ونىڭ ورىنباسارى ادىلەت احاتاەۆ پەن مەردىگەر اندرەي پوپلاۆسكيگە قاتىستى قىلمىستىق ءىس قارالدى, دەپ حابارلايدى inbusiness.kz سايتى.

سوت انىقتاعانداي, كارىم كوكىرەكباەۆ پەن ادىلەت احاتاەۆ لاۋازىمدى تۇلعالار بولا وتىرىپ, توو ديرەكتورى اندرەي پوپلاۆسكيمەن ءسوز بايلاسىپ, ورىندالعان جۇمىس اكتىلەرىنە كەدەرگىسىز قول قويۋ ءۇشىن ودان اسا ءىرى مولشەردە پارا العان. سونداي-اق, اندرەي پوپلاۆسكي شىن مانىندە ورىندالماعان قۇرىلىس-مونتاج جۇمىستارىنىڭ اكتىلەرىنە قول قويۋدى ۇيىمداستىرعان. وسى ارەكەتتەردىڭ سالدارىنان مەملەكەتتىك مەكەمەگە 1 987 827 622,63 تەڭگە كولەمىندە زالال كەلتىرىلگەن. القابيلەردىڭ ۇكىمىمەن كارىم كوكىرەكباەۆ مەن ادىلەت احاتاەۆ قىلمىستىق كودەكستىڭ 366-بابىنىڭ 4-بولىگى بويىنشا, ال اندرەي پوپلاۆسكي – 195-بابىنىڭ 4-بولىگىنىڭ 2) تارماعى جانە 367-بابىنىڭ 4-بولىگى بويىنشا كىنالى دەپ تانىلدى.

«سوت ۇكىمىمەن كارىم كوكىرەكباەۆقا 12 جىلعا, ادىلەت احاتاەۆ پەن اندرەي پوپلاۆسكيعا 11 جىلعا باس بوستاندىعىنان ايىرۋ جازاسى تاعايىندالدى. سوتتالعاندار ءومىر بويىنا مەملەكەتتىك قىزمەتتە لاۋازىمدى قىزمەت اتقارۋ قۇقىعىنان ايىرىلدى», – دەپ حابارلادى الماتى وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ ءباسپاسوز قىزمەتى.

ۇكىم زاڭدى كۇشىنە ەنگەن جوق.