جامبىلدا حالىقتىڭ ماسەلەسىن كوتەرگەن اۋىل اكىمىن اۋدان اكىمى سوتقا بەرمەك

جامبىل وبلىسىندا اۋىلدىڭ ماسەلەسىن كوتەرگەن اكىمنىڭ باسى بالەگە قالدى. حالىقتىڭ مۇڭ-مۇقتاجىن جوعارىعا جەتكىزبەك بولعان باسشىنىڭ ۇستىنەن قىزمەتتىك تەكسەرۋ تاعايىندالىپ, ءىسى تارتىپتىك كەڭەستە قارالماق. سونداي-اق سارىسۋ اۋدانىنىڭ اكىمى ونى سوتقا بەرمەك, دەپ حابارلايدى qandastar.kz اقپارات پورتالى ەۋرازيا 1 ارناسىنا سىلتەمە جاساپ.

جايىلما اۋىلىنىڭ تۇرعىندارى اۋىز سۋدى تاسىپ ىشەتىنىن ايتىپ, شاعىم ءبىلدىردى.

«ەرتە اعىپ قالسا, الا الماي قالامىز. سول ءۇشىن ساعات ون بىردەن باستاپ وسى جەردە قاراۋىلداپ وتىرامىز. سۋدى كەزەكپەن الامىز. ءبارىمىز ءۇش رەتپەن الامىز», — دەيدى اۋىل تۇرعىنى.

اۋىل تۇرعىندارى بارىنە سۋ جەتپەيتىنىن, ونىڭ ءبىر-اق ساعات بەرىلەتىنىن ايتتى.

«سۋدى ساعاتتاپ كۇتەمىز. ويتكەنى اۋىلداعى اعايىنعا اۋىز سۋ جەتپەي قالۋى مۇمكىن. سۋ ءبىر-اق ساعات اعادى. ءبىر ساعاتتا الساق الدىق, الماساق سۋسىز قالامىز. سۋ بولماعان سوڭ اششى سۋ ىشەمىز. ودان دەنساۋلىعىمىز قۇرىپ جاتىر», – دەيدى ولار.

اۋىل اكىمىنىڭ سوزىنشە, اۋىز سۋ جۇيەسى توزعاندىقتان ءتورت رەت جوبالىق-سمەتالىق قۇجات دايىندالعان. الايدا بەلگىسىز سەبەپتەرمەن قارجىلىق قولداۋ تاپپاي, تولىق جوندەۋ كورمەپتى. ون جىلدا ەسكى قۇبىر بىرنەشە رەت جارىلىپ, جاۋاپتى مەكەمە جۇمىسشىلارى جارىقتى جاماپ ۋاقىت وتكىزگەن ەكەن. ماسەلەنى كوتەرگەن اۋىل باسشىسى وبلىس اكىمىنىڭ جەكە قابىلداۋىنا ءتورت ايدان بەرى كىرە الماعان.

«حالىقتىڭ مۇڭ-مۇقتاجى بولعاندىقتان, ءوزىم ءىشىپ وتىرعان سوڭ شاعىم ءبىلدىردىم. حالىققا وبال بولدى عوي. نەگە بۇل ماسەلە قولداۋ تاپپايدى? استاناعا بارىپ, جاتىپ السا دا, اقشانى بولگىزەتىن ۋاقىت بولدى عوي», – دەيدى اكىم.

جايىلما اۋىلىندا بۇدان بولەك بىرقاتار ماسەلەلەر شەشىم تاپپاي جاتىر ەكەن. اۋىل اكىمى ماسەلەنى كوتەرگەنى ءۇشىن اۋدان باسشىسى قىزمەتتىك تەكسەرۋ تاعايىنداپتى. ەندى ول تارتىپتىك جازاعا تارتىلماق. ال ساكەن مامىتوۆ بولسا مەنى نەگىزسىز ايىپتادى دەپ وتىر.

ء«بىرىنشى كەزەكتە سوتقا بەرەمىن. بىزدە ادەپ جونىندەگى وكىل بار. سولارعا بەرەمىن. ول ءوز جۇمىسىن ءبىلۋى كەرەك. ال اۋىز سۋدىڭ جايى جۋىق ارادا شەشىلمەيدى. سەبەبى سۋ مۇناراسىن جاڭالاۋعا 1,7 ميلليارد تەڭگە قاجەت», – دەيدى اۋدان اكىمى.

قازىر قۇبىردىڭ توزۋ كورسەتكىشى الپىس پايىزعا جەتكەن. قوماقتى قارجى بيىل بولىنبەسە, تۇرعىندار سۋدى تاۋلىك بويى تۇتىنا المايدى. ءباز-باياعىشا سۋعا تالاسىپ, كەزەككە تۇرۋىنا تۋرا كەلەدى.