Jambylda halyqtyń máselesin kótergen aýyl ákimin aýdan ákimi sotqa bermek

Jambyl oblysynda aýyldyń máselesin kótergen ákimniń basy bálege qaldy. Halyqtyń muń-muqtajyn joǵaryǵa jetkizbek bolǵan basshynyń ústinen qyzmettik tekserý taǵaıyndalyp, isi tártiptik keńeste qaralmaq. Sondaı-aq Sarysý aýdanynyń ákimi ony sotqa bermek, dep habarlaıdy qandastar.kz aqparat portaly Eýrazııa 1 arnasyna silteme jasap.

Jaıylma aýylynyń turǵyndary aýyz sýdy tasyp ishetinin aıtyp, shaǵym bildirdi.

«Erte aǵyp qalsa, ala almaı qalamyz. Sol úshin saǵat on birden bastap osy jerde qaraýyldap otyramyz. Sýdy kezekpen alamyz. Bárimiz úsh retpen alamyz», — deıdi aýyl turǵyny.

Aýyl turǵyndary bárine sý jetpeıtinin, onyń bir-aq saǵat beriletinin aıtty.

«Sýdy saǵattap kútemiz. О́ıtkeni aýyldaǵy aǵaıynǵa aýyz sý jetpeı qalýy múmkin. Sý bir-aq saǵat aǵady. Bir saǵatta alsaq aldyq, almasaq sýsyz qalamyz. Sý bolmaǵan soń aщy sý ishemiz. Odan densaýlyǵymyz quryp jatyr», – deıdi olar.

Aýyl ákiminiń sózinshe, aýyz sý júıesi tozǵandyqtan tórt ret jobalyq-smetalyq qujat daıyndalǵan. Alaıda belgisiz sebeptermen qarjylyq qoldaý tappaı, tolyq jóndeý kórmepti. On jylda eski qubyr birneshe ret jarylyp, jaýapty mekeme jumysshylary jaryqty jamap ýaqyt ótkizgen eken. Máseleni kótergen aýyl basshysy oblys ákiminiń jeke qabyldaýyna tórt aıdan beri kire almaǵan.

«Halyqtyń muń-muqtajy bolǵandyqtan, ózim iship otyrǵan soń shaǵym bildirdim. Halyqqa obal boldy ǵoı. Nege bul másele qoldaý tappaıdy? Astanaǵa baryp, jatyp alsa da, aqshany bólgizetin ýaqyt boldy ǵoı», – deıdi ákim.

Jaıylma aýylynda budan bólek birqatar máseleler sheshim tappaı jatyr eken. Aýyl ákimi máseleni kótergeni úshin aýdan basshysy qyzmettik tekserý taǵaıyndapty. Endi ol tártiptik jazaǵa tartylmaq. Al Sáken Mamytov bolsa meni negizsiz aıyptady dep otyr.

«Birinshi kezekte sotqa beremin. Bizde ádep jónindegi ókil bar. Solarǵa beremin. Ol óz jumysyn bilýi kerek. Al aýyz sýdyń jaıy jýyq arada sheshilmeıdi. Sebebi sý munarasyn jańalaýǵa 1,7 mıllıard teńge qajet», – deıdi aýdan ákimi.

Qazir qubyrdyń tozý kórsetkishi alpys paıyzǵa jetken. Qomaqty qarjy bıyl bólinbese, turǵyndar sýdy táýlik boıy tutyna almaıdy. Báz-baıaǵysha sýǵa talasyp, kezekke turýyna týra keledi.