جاڭالىقتار
جامبىلدا جولاۋشىلار اۆتوبۋسى ورتەندى
جامبىل وبلىسىندا جولاۋشىلار اۆتوبۋسىنان ءورت شىقتى, ابىروي بولعاندا ەشكىم زارداپ شەكپەگەن, دەپ حابارلايدى تجم-عا سىلتەمە جاساعان qandastar.kz
ۆەدومستۆونىڭ ءباسپاسوز قىزمەتىنىڭ مالىمەتىنشە, جامبىل وبلىسى جۋالى اۋدانىندا «الماتى – تاشكەنت» اۆتوجولىنىڭ 553-شاقىرىمىندا جولاۋشىلار اۆتوبۋسى ورتەنگەن.
ءورت سوندىرۋشىلەر كەلگەن كەزدە اۆتوبۋس تۇراقتا تۇرعان, الايدا وت كولىك قۇرالىن تەز شارپىعان.
تجم قىزمەتكەرلەرىنىڭ جەدەل ءىس-قيمىلىنىڭ ارقاسىندا ءورت تولىقتاي سوندىرىلگەن.
«زارداپ شەككەندەر جوق. بارلىق 40 جولاۋشى جولاي ءوتىپ بارا جاتقان كولىكپەن جونەلتىلدى. قۇتقارۋشىلاردىڭ ۇيلەسىمدى ارەكەتتەرى قايعىلى جاعدايدىڭ الدىن الۋعا جانە جولدىڭ قارقىندى بولىگىندە قاۋىپتى جويۋعا مۇمكىندىك بەردى», — دەلىنگەن حابارلامادا.
