جامبىلداعى جول اپاتىنان قازا تاپقان پوليتسەيدىڭ ءبىرى – 11 بالانىڭ اكەسى

فوتو: اشىق دەرەككوز

جامبىل وبلىسىنداعى 6 ادامنىڭ ءومىرىن قيعان جول-كولىك اپاتىنان قازا تاپقان پوليتسەيدىڭ ءبىرى «100 جاڭا ەسىم» جوباسىنىڭ ەكىنشى كەزەڭىنىڭ جەڭىمپازى, 11 بالانىڭ اكەسى 46 جاستاعى عالىم ارىستانباەۆ ەكەنى بەلگىلى بولدى, دەپ حابارلايدى Ulysmedia.kz.

8 بالا اسىراپ العان

جامبىل وبلىسى, مەركى اۋدانىنىڭ تۇرعىنى بولعان عالىم ارىستانباەۆ جامبىلدىقتارعا جاقسى تانىس. ونىڭ وتباسى وزدەرىنىڭ 3 بالاسىنان بولەك, تاعى 8 بالانى بالالار ۇيىنەن اسىراپ الىپ, كەيىن “100 جاڭا ەسىم” جوباسىنا قاتىسقان. كوپشىلىك داۋىسپەن جوبانىڭ ەكىنشى كەزەڭىنىڭ جەڭىمپازى اتاندى.

مارقۇم ع.ارىستانباەۆ جۇبايى اليامەن بىرگە وتباسى ۇلگىسىندەگى بالالار ءۇيىن جاساعان.

“مەرەيلى وتباسى”

سونداي-اق ارىستانباەۆتار وتباسى «مەرەيلى وتباسى» رەسپۋبليكالىق كونكۋرسىنىڭ دا ءفيناليسى بولعان.

«ارىستانباەۆتار وتباسى كوپۇلتتى. ولاردىڭ ازەربايجان, قىتاي, وزبەك ۇلتىنان ءۇش قىزى بار. بالالارى ورىس جانە سىعان. ولاردىڭ بارلىعى ءتۇرلى ۇلت وكىلدەرى بولعانىمەن بارلىعى دا قازاق تىلىندە سويلەيدى. بالالار وتە جاقسى ءارى مەيىرىمدى, ولاردى اتا-انالارى ۇلگىلى ازامات بولۋعا تاربيەلەۋدە. ولاردىڭ بارلىعى دا قازاقستاننىڭ بەلدى ازاماتتارى بولادى دەگەن ۇمىتتەمىز», دەيدى جامبىل وبلىستىق ءىىد ءباسپاسوز قىزمەتىنىڭ جەتەكشىسى گۇلسارا مۇحتارقۇلوۆا.

ەڭبەك ءوتىلى

جامبىل وبلىستىق پد پاترۋلدىك پوليتسيا باتالونىنىڭ اعا ينسپەكتورى, پوليتسيا كاپيتانى عالىم ارىستانباەۆ 2006 جىلدان بەرى ىشكى ورگاندارىندا ەڭبەك ەتىپ كەلگەن.

ەسكە سالا كەتسەك, بۇگىن تۇندە, ياعني 17 تامىزدا ساعات 01:00 شاماسىندا «مەركى – شۋ – بۋرىلبايتال» رەسپۋبليكالىق ماڭىزى بار اۆتوجولىنىڭ 40-شاقىرىمىندا اۋىر جول-كولىك وقيعاسى بولىپ, سالدارىنان 6 ادام قازا تاۋىپ, 3 ادام ءتۇرلى دەنە جاراقاتىمەن اۋرۋحاناعا جەتكىزىلگەنىن حابارلاعانبىز.