«جان دوس دەگەن وسىنداي بولۋى كەرەك»: يليا يلين كلينيكادا ەمدەلىپ جاتقان الماس وتەشەۆكە باردى

فوتوكوللاج: اشىق دەرەككوز

قازاقستاندىق زىلتەمىرشى يليا يلين كلينيكادا ەمدەلىم جاتقان دوسى, اۋىر اتلەت الماس وتەشەۆكە بارىپ, جاعدايىن سۇرادى. ول الەۋمەتتىك پاراقشاسىندا ەكەۋىنىڭ ۆيدەوسىن جاريالادى, دەپ حابارلايدى qandastar.kz Azattyq Rýhy-نا سىلتەمە جاساپ.

«ۋادە ەتكەنىمدەي, مەن  الماستىڭ جاعدايىن ايتىپ وتىرمىن. قازىر ونىڭ جاعدايى جاقسى. ول استاناداعى  وڭالتۋ ورتالىعىندا ەم قابىلداپ جاتىر. ەندەشە, ساۋىعىپ كەتەتىن وسى قيىن جولدا وعان كۇش-قۋات تىلەيىك. الماس دوسىم كلينيكادا 5 اي ەم الادى. ونىڭ ەمدەلۋ جولى وڭاي بولمايدى. بىراق ءبىز دايىنبىز. فەدەراتسيا وسىنداعى ەمىن تولىق قارجىلاندىرىپ جاتىر. وسى وقيعادان باسىمىزدى تىك كوتەرىپ, جەڭىسپەن شىعايىق», – دەيدى يليا يلين.

الماس وتەشەۆتىڭ ءوزى «100 تەڭگەڭ بولعانشا, 100 دوسىڭ بولسىن» دەپ بەكەر ايتپاعان دەيدى.

«يليا دوسىم كەلدى. مەنى ەمدەپ جاتىر. جان دوس دەگەن وسىنداي بولۋى كەرەك, جىگىتتەر. وسىنداي دوستارىڭ كوپ بولسىن. جامان نارسەگە جولامايىق. ادال جولمەن جۇرەيىك. ادال جولمەن نان تابايىق. امان بولايىق. يليا يلين سياقتى وليمپيادا چەمپيوندارى كوبەيە بەرسىن. قازاقتىڭ باتىرلارى كوپ بولسىن», – دەيدى الماس وتەشەۆ.

وسىعان دەيىن الماس وتەشەۆ «ۋاقىت كورسەتەدى» پودكاستىندا جەكە ومىرىندەگى قيىندىقتار جايلى ايتقان بولاتىن. كەيىن يليا يلين وتەشەۆتى كلينيكاعا جاتقىزعانىن ايتىپ, دوسىن قيىن كەزەڭدە تاستامايتىنىن ايتقان ەدى.