جاڭا ادامداردىڭ جاڭا كۇرەسى: قوستانايداعى بالالار اۋرۋحاناسىن «قايتارۋ» كەرەك

فوتو: اشىق دەرەككوز

قوستانايداعى بالالار اۋرۋحاناسى التى جىلدان بەرى جابىق تۇر. 2,7 ميلليارد تەڭگە بولىنگەن جوندەۋ جۇمىستارى جۇزەگە اسىرىلماعان. جاڭا ادامداردىڭ «حالىق قاھارى» ازاماتتىق ناۋقانى بەلسەندىلەرى ميللياردتاعان تەڭگە ءىز-ءتۇسسىز جوعالماۋى كەرەك ەكەنىن جانە ماسەلە ۇمىتىلماۋى ءتيىس ەكەنىن ەسكە سالۋ ءۇشىن قالاعا قايتا ورالدى, دەپ حابارلايدى qandastar.kz

بۇل وقيعا 2019 جىلى وبلىستىق بالالار اۋرۋحاناسى كۇردەلى جوندەۋگە جابىلعان كەزدە باستالدى. باستاپقىدا جوباعا 1,2 ميلليارد تەڭگە بولىنگەن, كەيىن تاعى 1,5 ميلليارد تەڭگە قوسىمشا ءبولىندى. الايدا التى جىل وتسە دە, عيمارات جوندەلمەگەن كۇيىندە تۇر. اتا-انالار بالالارىن ەمدەتۋ ءۇشىن باسقا اۋدانداردان مەديتسينالىق كومەك ىزدەۋگە ءماجبۇر.

باستاپقى كەزدەن-اق جوندەۋ جۇمىستارىنا وبلىستىق دەنساۋلىق ساقتاۋ باسقارماسىنىڭ باسشىسى دانيار دجانداەۆ جاۋاپتى بولعان. 2023 جىلى «حالىق قاھارى» بەلسەندىلەرى دجانداەۆقا ارەكەتسىزدىگى ءۇشىن حالىقتىق انتيجۇلدەنى — «قارا تاڭبانى» تابىستاعان بولاتىن. سول كەزدە شەنەۋنىك كىناسىن مويىنداماي, الەۋمەتتىك جەلىلەردە جانجال شىعاردى. بۇگىن بەلسەندىلەر باسقارما عيماراتىنىڭ الدىنا ءۇش مەترلىك «حالىق قاھارى» ستەلاسىن ورناتىپ, جاۋاپكەرشىلىكتەن قاشىپ قۇتىلۋ مۇمكىن ەمەس ەكەنىن جانە مىندەتتەمەلەر ورىندالۋى ءتيىس ەكەنىن ەسكە سالدى.

«حالىق قاھارى» ازاماتتىق ناۋقانىنىڭ جەتەكشىسى اليحان سارسەنوۆ: «ءبىز – جىلى كابينەتتەردەن داۋسىن ەستىمەيتىندەردىڭ اتىنان سويلەيمىز. حالىقتىڭ قاھارىنىڭ سيمۆولى رەتىندە ءۇش مەترلىك ستەلا ورناتىپ, قوستاناي وبلىسىنىڭ دەنساۋلىق ساقتاۋ باسقارماسىنا ناقتى سۇراق قويدىق: «اۋرۋحانا قايدا?» بۇل – بالالار مەن قوعام الدىنداعى بورىشتى ەسكە سالۋ. ءبىز دەنساۋلىق ساقتاۋ باسقارماسى ءتيىستى شارالار قابىلداپ, اۋرۋحانانىڭ جوندەۋىن سوڭىنا دەيىن جەتكىزەدى دەپ سەنگىمىز كەلەدى».

اۋرۋحانالار ەمدەۋى كەرەك, جوندەۋدى كۇتىپ بوس تۇرماۋى ءتيىس. «حالىق قاھارى» ازاماتتىق ناۋقانى ادىلەت ءۇشىن كۇرەستى جالعاستىرىپ, مەديتسينالىق مەكەمەنىڭ قوستاناي تۇرعىندارىنا قايتادان قىزمەت كورسەتۋىنە قول جەتكىزەدى.