Jańa oqý jyly bastaldy: mınıstr Ǵanı Beısembaev bilim kúnimen quttyqtady

Foto: ashyq derekkóz

Oqý-aǵartý mınıstri Ǵanı Beısembaev qazaqstandyqtardy jańa oqý jylynyń bastalýymen quttyqtady. Bul týraly vedomstvo Telegram-daǵy arnasynda habarlady.

«Qadirli ustazdar, ata-analar jáne oqýshylar! Búgin 2024-2025 oqý jylynyń jańa paraǵy ashyldy. Elimizdiń barlyq óńirlerinde Bilim kúnin asyǵa kútken 3,9 mln bala súıikti mektebimen, ustazdarymen qaıta qaýyshty. Memleket oqýshylardyń sapaly bilim, sanaly tárbıe alýy úshin barlyq jaǵdaıdy jasaýda. Búgin 90 myńǵa jýyq oqýshy sý jańa mektepterde oqý jylyn bastaıdy. Onyń ishinde «Jaıly mektep» ulttyq jobasymen salynǵandary da bar. Al 200 myńnan astam bala kúrdeli jóndeýden ótip, qaıta jabdyqtalǵan mektepterde bilim alady. 1 qyrkúıek – alǵash ret mektep tabaldyryǵyn attaǵan balalar úshin erekshe mereke. Birinshi synypqa 352 myń bala qabyldandy.

Al 11 synypqa ótken 219 myń oqýshy mekteptegi oqýyn aıaqtaıdy. Qymbatty balalar, oqý jyly sizderdi jańa jetistikterge jetelep shabyttandyratyn qyzyqty, tanymdy ári taǵylymdy bolsyn dep tileımin!