جاڭالىقتار
جاڭا وقۋ جىلىندا قازاقستاندا 200-دەن استام مەكتەپ سالىنادى
2025–2026 وقۋ جىلىندا 300 مىڭنان استام وقۋشى ورنىنا ەسەپتەلگەن 200-دەن استام جاڭا مەكتەپ سالۋ جوسپارلانىپ وتىر, دەپ حابارلايدى Qandastar.kz اقپارات پورتالى. سونىڭ ىشىندە 206 مىڭ وقۋشى ورنىنا ارنالعان 112 مەكتەپ «كەلەشەك مەكتەپتەرى» ۇلتتىق جوباسى اياسىندا پايدالانۋعا بەرىلەدى. جاڭا مەكتەپتەردىڭ جارتىسىنا جۋىعى اۋىلداردا ورنالاسادى.
بۇل جوبالاردى جۇزەگە اسىرۋ قالا مەن اۋىل مەكتەپتەرى اراسىنداعى الشاقتىقتى ازايتۋعا, 15 اپاتتى مەكتەپ ماسەلەسىن شەشۋگە, ءۇش اۋىسىمدى وقىتۋدى جانە 150 مىڭعا جۋىق وقۋشى ورنى تاپشىلىعىن جويۋعا مۇمكىندىك بەرەدى.
قوسىمشا 1000 اۋىل مەكتەبىندە جوندەۋ جۇمىستارى جۇرگىزىلىپ, جيھاز جاڭارتىلادى, كىتاپحانالار, اسحانالار مەن قاۋىپسىزدىك جۇيەلەرى جابدىقتالادى. سونىمەن قاتار حيميا, فيزيكا, بيولوگيا, روبوتوتەحنيكا جانە STEM باعىتتارى بويىنشا 1000 زاماناۋي پاندىك كابينەت ساتىپ الىنۋدا.
مەملەكەت باسشىسىنىڭ تاپسىرماسىنا سايكەس, بىرىڭعاي زاماناۋي مەكتەپ ينفراقۇرىلىمى فورماتىنا كوشۋ ءۇشىن 2029 جىلعا دەيىن 1231 مەكتەپتى جاڭعىرتۋ باعدارلاماسى باستالادى. بيىل 248 مەكتەپ رەنوۆاتسيادان وتەدى. بۇل مەكتەپتەردە شاتىرلار اۋىستىرىلىپ, قاسبەتتەر مەن تەرەزەلەر جاڭارتىلادى, ينجەنەرلىك جەلىلەرگە كۇردەلى جوندەۋ جۇرگىزىلىپ, اۋماق كوگالداندىرىلىپ, اباتتاندىرىلادى.
ەسكە سالا كەتەيىك, 2019 جىلدان باستاپ قازاقستاندا ءبىلىم بەرۋ سالاسىندا اۋقىمدى ينفراقۇرىلىمدىق جوبالار جۇزەگە اسىرىلىپ كەلەدى. وسى ۋاقىت ىشىندە 1200 جاڭا مەكتەپ اشىلىپ, 1 ميلليوننان استام وقۋشى ورنى قامتاماسىز ەتىلدى. بۇل شارالار مەكتەپتەردىڭ شامادان تىس جۇكتەمەسىن جانە ءۇش اۋىسىمدى وقىتۋدى ايتارلىقتاي ازايتۋعا مۇمكىندىك بەردى. قازىرگى تاڭدا 3000 مەكتەپ ءبىر اۋىسىممەن جۇمىس ىستەيدى.
