جاڭا وزگەرىس ەنگىزىلگەن «ۇماي» ايەلدەر يپوتەكاسى قايتا ىسكە قوسىلادى

فوتو: svao.mos.ru

ايەلدەرگە ارنالعان «ۇماي» يپوتەكالىق باعدارلاماسى كەلەسى جىلى قايتا ىسكە قوسىلادى. باعدارلاما ايەلدەرگە ءوز باسپاناسىن الۋعا قولايلى مۇمكىندىكتەر بەرەدى, دەپ حابارلايدى Halyq Uni.

بۇل جاڭالىقتى «وتباسى بانك» اق باسقارما توراعاسىنىڭ ورىنباسارى نۇرلان اقشانوۆ Facebook-تەگى جەكە پاراقشاسىنا جاريالادى. ونىڭ ايتۋىنشا, يپوتەكانى الۋ ءۇشىن العاشقى جارنا رەتىندە نەسيەنىڭ 20 پايىزىن «وتباسى» بانكىنىڭ دەپوزيتىندە ساقتاۋ قاجەت. ىرىكتەۋ كەزىندە دەپوزيتتەگى جيناقتالعان سىياقىنىڭ كولەمى ماڭىزدى ءرول اتقارادى. قاتىسۋشىلارعا ەشقانداي كەزەكتە تۇرۋدىڭ قاجەتى جوق. ال پاتەردى كەز كەلگەن قالادان نەمەسە اۋىلدان ساتىپ الۋعا بولادى.

بۇرىن 4 قالاعا – استانا, الماتى, اتىراۋ, اقتاۋعا وتىنىمدەر كولەمى بويىنشا شەكتەۋلەر بولعان. ەندى بۇل شەكتەۋلەر دە جويىلدى. ايتپاقشى, ءبىزدىڭ بانكتە بىرگە قارىز الۋشى اتا-انالاردان باستاپ, كۇيەۋى, ەرەسەك بالالارى, قۇربىلارى, دوستارى مەن تۋىستارى بولا الادى. شاكىرتاقىنى دا كىرىس رەتىندە قارايمىز. قىزىڭىزعا جاڭا قالادا پاتەر العىڭىز كەلسە, ايەلدەر يپوتەكاسىن نەگە پايدالانباسقا? – دەپ جازدى نۇرلان اقشانوۆ.

باعدارلاماعا كەز كەلگەن وتباسىلىق مارتەبەگە يە ايەلدەر قاتىسا الادى. ءارى ول ايەلدىڭ ءبىرىنشى, ەكىنشى نەمەسە ءۇشىنشى پاتەرى بولۋى مۇمكىن.

قاتىسۋشىلاردىڭ تابىسى 900 مىڭ تەڭگەدەن اسپاۋى كەرەك. سونىمەن قاتار ايەلدەر وزدەرىنىڭ زەينەتاقى جيناقتارىن پايدالانىپ, جاقىن تۋىستارىنىڭ اقشاسىن دا دەپوزيتكە اۋدارۋعا بولادى.