جاڭالىقتار
جاڭا توسەلگەن اسفالت ويىلىپ كەتكەن: بەلگىلى كومپانيا الماتىداعى جولدى قايتا قالپىنا كەلتىرەدى
فوتو: اشىق دەرەككوز
الماتىدا بۇقتىرما كوشەسى مەن قۇلجا تاسجولىنىڭ قيىلىسىندا 2021 جىلى توسەلگەن اسفالت ويىلىپ, شۇڭقىرلار پايدا بولدى, دەپ حابارلايدى Dalanews.kz.
الماتى قالالىق موبيلدىلىك باسقارماسىنىڭ مالىمەتىنشە, جاۋاپكەرشىلىكتى جول جوندەگەن كومپانيا ءوز موينىنا الادى. ەستاكادا بويىندا قوزعالىس 2021 جىلى اشىلعان.
بىراق جولايرىق 2023 جىلدىڭ قازان ايىندا پايدالانۋعا بەرىلگەندىكتەن نىسانعا 2026 جىلعا دەيىن مەردىگەر كەپىل بولادى.
«الدىن الا مالىمەت بويىنشا, اسفالتبەتون جابىنىنىڭ اقاۋى گيدرووقشاۋلاعىش ماتەريالدىڭ قابىرشاقتانۋى سالدارىنان پايدا بولدى. ونىڭ ناقتىلى سەبەپتەرىن انىقتاۋ ءۇشىن زاقىمدانعان ۋچاسكە اشىلادى. «Bazis construction» جشس كومپانياسىنا كەپىلدىك مىندەتتەمەلەرى اياسىندا ءوز قاراجاتى ەسەبىنەن الداعى 10 كۇن ىشىندە قالپىنا كەلتىرۋ جۇمىسىن جۇرگىزۋگە نۇسقاۋ بەرىلدى», – دەلىنگەن حابارلامادا.
باسقارما قوزعالىس قاۋىپسىزدىگىن قامتاماسىز ەتۋ ءۇشىن قازىرگى كەزدە اقاۋلى ۋچاسكەگە ۋاقىتشا جوندەۋ جۇرگىزىلگەنىن اتاپ ءوتتى.
ەسكە سالايىق, بۇعان دەيىن قر پرەمەر-ءمينيسترى ولجاس بەكتەنوۆ جول ساپاسى جونىندە تۇرعىندار شاعىمىنا دەر كەزىندە نازار اۋدارۋدى تاپسىرعان بولاتىن.
وسى تۇستا كولىك ءمينيسترى مارات قاراباەۆ جول جوبالارىنا تارتىلعان كومپانيالاردىڭ جاۋاپكەرشىلىگىن ارتتىرۋدىڭ جاڭا ءتاسىلى ەنگىزىلەتىنىن ايتتى.
«سوڭعى جىلدارداعى جوبالاردى ىسكە اسىرۋ تاجىريبەسىن ەسكەرە وتىرىپ, مەردىگەرلەردىڭ, جوبالاۋشىلاردىڭ جاۋاپكەرشىلىگىن ارتتىرۋ ماقساتىندا وسى جوبالاردا حالىقارالىق قارجى ۇيىمدارىنىڭ قولداۋىمەن EPCM كەلىسىمشارتى جانە FIDIC قاعيداسى ەنگىزىلۋدە. ونداعى شارتتارعا سايكەس مەردىگەر كومپانيا ءوزى جوبالاپ, ءوزى سالىپ, 7 جىلعا دەيىن كۇتىپ ۇستايدى», — دەدى ول.
