Jańalyqtar
Jańa tóselgen asfalt oıylyp ketken: Belgili kompanııa Almatydaǵy joldy qaıta qalpyna keltiredi
Foto: ashyq derekkóz
Almatyda Buqtyrma kóshesi men Qulja tasjolynyń qıylysynda 2021 jyly tóselgen asfalt oıylyp, shuńqyrlar paıda boldy, dep habarlaıdy Dalanews.kz.
Almaty qalalyq mobıldilik basqarmasynyń málimetinshe, jaýapkershilikti jol jóndegen kompanııa óz moınyna alady. Estakada boıynda qozǵalys 2021 jyly ashylǵan.
Biraq jolaıryq 2023 jyldyń qazan aıynda paıdalanýǵa berilgendikten nysanǵa 2026 jylǵa deıin merdiger kepil bolady.
«Aldyn ala málimet boıynsha, asfaltbeton jabynynyń aqaýy gıdrooqshaýlaǵysh materıaldyń qabyrshaqtanýy saldarynan paıda boldy. Onyń naqtyly sebepterin anyqtaý úshin zaqymdanǵan ýchaske ashylady. «Bazis construction» JShS kompanııasyna kepildik mindettemeleri aıasynda óz qarajaty esebinen aldaǵy 10 kún ishinde qalpyna keltirý jumysyn júrgizýge nusqaý berildi», – delingen habarlamada.
Basqarma qozǵalys qaýipsizdigin qamtamasyz etý úshin qazirgi kezde aqaýly ýchaskege ýaqytsha jóndeý júrgizilgenin atap ótti.
Eske salaıyq, buǵan deıin QR Premer-Mınıstri Oljas Bektenov jol sapasy jóninde turǵyndar shaǵymyna der kezinde nazar aýdarýdy tapsyrǵan bolatyn.
Osy tusta kólik mınıstri Marat Qarabaev jol jobalaryna tartylǵan kompanııalardyń jaýapkershiligin arttyrýdyń jańa tásili engiziletinin aıtty.
«Sońǵy jyldardaǵy jobalardy iske asyrý tájirıbesin eskere otyryp, merdigerlerdiń, jobalaýshylardyń jaýapkershiligin arttyrý maqsatynda osy jobalarda halyqaralyq qarjy uıymdarynyń qoldaýymen EPCM kelisimsharty jáne FIDIC qaǵıdasy engizilýde. Ondaǵy sharttarǵa sáıkes merdiger kompanııa ózi jobalap, ózi salyp, 7 jylǵa deıin kútip ustaıdy», — dedi ol.
