جاڭا زاڭ ەلىمىزدەگى ماسس-مەديانىڭ الەۋەتىن ارتتىرا تۇسەدى – مەملەكەت باسشىسى

مەملەكەت باسشىسى سونىمەن قاتار اتالعان زاڭ اقپاراتتىق دەربەستىگىمىزدى نىعايتۋعا مۇمكىندىك بەرەتىنىن ايتتى.

«وزدەرىڭىزگە ءمالىم, جۋىردا مەن «ماسس-مەديا تۋرالى» زاڭعا قول قويدىم. وتە ماڭىزدى قۇجات. جۋرناليستەردىڭ مۇددەسى مەن قۇقىقتارىن قورعاۋ تەتىكتەرى كۇشەيتىلگەن دەپ ايتۋعا بولادى. بۇل قۇجات ەلىمىزدەگى ماسس-مەديانىڭ الەۋەتىن ارتتىرا تۇسەدى دەپ ويلايمىن. سونداي-اق اقپاراتتىق دەربەستىگىمىزدى نىعايتۋعا مۇمكىندىك بەرەدى. ەرتەڭ پارلامەنتتىڭ كەزەكتى سەسسياسى اياقتالادى. دەپۋتاتتار ماڭىزدى وقيعالاردىڭ بەل ورتاسىندا ءجۇر. سايلاۋشىلارمەن تىعىز جۇمىس ىستەپ جاتىر. ولار وزەكتى ماسەلەلەردى كوتەرىپ, قوعامدىق پىكىرتالاسقا ۇيىتقى بولىپ وتىر. حالىققا قاجەت زاڭداردى قابىلداۋ جونىندە باستامالار كوتەرۋدە. وسى سەسسيانىڭ وزىندە ەلدىڭ دامۋىنا تىكەلەي ىقپال ەتەتىن 100-دەن استام زاڭ قابىلداندى», — دەدى پرەزيدەنت.

مەملەكەت باسشىسى جۋرناليستەر قاۋىمى ۇلتتىق پارلامەنتاريزمدى دامىتۋعا قاشاندا زور ۇلەس قوسىپ كەلەتىنىن جەتكىزدى.

«جالپى, دەپۋتات پەن جۋرناليست قىزمەتى ءبىرى-بىرىمەن تىعىز بايلانىسىپ جاتىر. ەكەۋى دە ەل مۇددەسىن قورعايدى. حالىق سەنىمىن ارقالاپ, وعان مۇلتىكسىز قىزمەت ەتەدى. قازىر دەپۋتاتتار كورپۋسى مەن ماسس-مەديا وكىلدەرى ۇيلەسىمدى جۇمىس ىستەپ جاتىر. جۋرناليستەر قاۋىمى ۇلتتىق پارلامەنتاريزمدى دامىتۋعا قاشاندا زور ۇلەس قوسىپ كەلەدى. قازىرگى دەپۋتاتتار قۇرامىندا اقپارات سالاسىنىڭ وكىلدەرى جەتكىلىكتى. اتاپ ايتقاندا, نۇرتورە ءجۇسىپ, ەرمۇرات باپي, قازىبەك يسا, سەرگەي پونومارەۆ, جاناربەك ءاشىمجان, بيبىگۇل جەكسەنباي, ايگۇل قاپباروۆا سەكىلدى ارىپتەستەرىڭىز كوپشىلىككە بەلگىلى. ۇلت مۇددەسىن قورعاپ جۇرگەن جۋرناليستەردىڭ پارلامەنت تورىندە وتىرۋى – زاڭدىلىق. ايتپاقشى, پرەزيدەنت اكىمشىلىگىندە دە ارىپتەستەرىڭىز از ەمەس. ولار ءوز كاسىبي ورتاسىنا قولداۋ ءبىلدىرىپ, بۇقارالىق اقپارات قۇرالدارى مەن مەملەكەتتىك ورگاندار اراسىندا التىن كوپىر قىزمەتىن اتقارادى. جاڭا اقپاراتتىق داۋىرگە قادام باستىق. وسى ورايدا مەملەكەتتىك باسقارۋ جۇيەسى ءسوز بىلەتىن, ءتيىمدى ءارى جان-جاقتى قارىم-قاتىناس ورناتا الاتىن ادامدارعا ءزارۋ. سوندىقتان ءوز مانسابىن مەملەكەتتىك قىزمەتپەن بايلانىستىرعان نەمەسە بايلانىستىرۋدى جوسپارلاپ جۇرگەن ارىپتەستەرىڭىز وسى سالادا دا ءوز الەۋەتىن تولىق جۇزەگە اسىرا الادى», — دەدى پرەزيدەنت.