جاڭا زاڭ: ەندى دارىگەر قاتەلەسسە, اقشالاي تولەم الۋعا بولادى

فوتو: pixabay.com

ساقتاندىرۋ تولەمدەرى دارىگەرلەردىڭ بايقاۋسىزدا جاسالعان كاسىبي قاتەلىكتەرىنەن زارداپ شەككەن پاتسيەنتكە تولەنەتىن بولادى.

مەديتسينا قىزمەتكەرلەرىنىڭ كاسىبي جاۋاپكەرشىلىگىن ساقتاندىرۋدى ەنگىزەتىن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنساۋلىق ساقتاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭنىڭ نورمالارى كۇشىنە ەندى, دەپ حابارلايدى qandastar.kz  Skifnews.kz اقپارات پورتالىنا سىلتەمە جاساپ.

وزگەرىستەرگە سايكەس, مەديتسينالىق ۇيىمدار مەن جەكە مەديتسينالىق پراكتيكامەن اينالىساتىن جەكە تۇلعالار مەديتسينا قىزمەتكەرلەرىنىڭ كاسىبي جاۋاپكەرشىلىگىن ساقتاندىرۋعا جانە 14 ساقتاندىرۋ ۇيىمىن قامتيتىن بىرىڭعاي ساقتاندىرۋ پۋلىمەن ساقتاندىرۋ شارتىن جاساسۋعا مىندەتتى.

“ساقتاندىرۋ تولەمدەرى دارىگەرلەردىڭ بايقاۋسىزدا جاسالعان كاسىبي قاتەلىكتەرىنەن زارداپ شەككەن پاتسيەنتكە تولەنەتىن بولادى. ءومىرى مەن دەنساۋلىعىنا زيان كەلتىرۋ فاكتىسىن راستاۋ جانە ساقتاندىرۋ تولەمىن الۋ ءۇشىن پاتسيەنتكە نەمەسە ونىڭ جاقىن تۋىستارىنا دەنساۋلىق ساقتاۋ سۋبەكتىسىنە جۇگىنۋ قاجەت. مەديتسينالىق قىزمەتتى جۇزەگە اسىرۋ ناتيجەسىندە پاتسيەنتتىڭ ءومىرى مەن دەنساۋلىعىنا زيان كەلتىرۋ فاكتىسىنىڭ بولۋى تۋرالى شەشىمدى تاۋەلسىز ساراپتاما كوميسسياسى قابىلدايدى”, – دەلىنگەن حابارلامادا.

پاتسيەنت تسك قورىتىندىسىنىڭ ناتيجەلەرىمەن كەلىسپەگەن جاعدايدا دەنساۋلىق ساقتاۋ مينيسترلىگىنىڭ مەديتسينالىق جانە فارماتسەۆتيكالىق باقىلاۋ كوميتەتىنە نەمەسە سوتقا جۇگىنۋگە قۇقىلى.

“زاڭمەن ساقتاندىرۋ تولەمدەرىنىڭ ەڭ از سومالارى بەلگىلەنگەن, ولار  پاتسيەنتكە ءۇشىنشى, ەكىنشى جانە ءبىرىنشى توپتاعى مۇگەدەكتىك بەلگىلەنگەن جاعدايدا – 500, 600, 800 اەك قۇرايدى, تيىسىنشە مۇگەدەكتىگى بار بالا – 500 اەك, ولىمگە اكەلگەن زيان كەلتىرىلگەنى ءۇشىن – 3 000 اەك, مۇگەدەكتىك بەلگىلەنبەي پاتسيەنتتىڭ ءومىرى مەن دەنساۋلىعىنا كەلتىرىلگەن زيان ءۇشىن – 300 اەك-تەن اسپايتىن ساقتاندىرۋ تولەمدەرى تولەنەتىن بولادى. سونداي-اق, زاڭمەن وسى دەنساۋلىق ساقتاۋ سۋبەكتىسى تولەگەن ساقتاندىرۋ سىيلىقاقىسى سوماسىنىڭ 5%-ىنان اسپايتىن مولشەردە ساقتاندىرىلعان مەديتسينا قىزمەتكەرلەرىنە ادۆوكاتتاردىڭ قىزمەتتەرىنە اقى تولەۋگە ارنالعان شىعىستاردى وتەۋ سوماسى بەلگىلەنگەن”, – دەلىنگەن اقپاراتتا.