Jańa zań: kredıt tóleýdi keıinge qaldyrýǵa bolady. Ol jeńildikke kimder ıe

Ulysmedia kollajy

Qazaqstanda qarjylyq kórsetiletin qyzmetterdi tutynýshylardyń quqyqtaryn qorǵaý kúsheıtiledi. Qarjy naryǵyn retteý jáne damytý agenttiginiń tóraǵasy Mádına Ábilqasymova Májilis otyrysynda jańa zań jobasy boıynsha (búgin birinshi oqylymda qaraldy) nesıeni tóleýde kimder jeńildik alatynyn aıtty, dep habarlaıdy Qandastar.kz Ulysmedia.kz silteme jasap.

Depýtattar bastamasy

Qarjy naryǵyn retteý jáne damytý agenttiginiń tóraǵasy Mádına Ábilqasymova qarjy qyzmetteri boınysha tutynýshylardyń quqyqtaryn qorǵaýdy odan ári kúsheıtý jáne qarjylyq qoljetimdilikti arttyrý sharalary usynylǵanyn aıtty. Atalǵan túzetýlerge Parlament depýtattary bastamashy bolǵan. Bul rette eń aldymen, múgedektigi bar adamdar men halyqtyń áleýmettik osal toptaryna jatatyn azamattardy qorǵaýǵa erekshe nazar aýdarylady.

«Qarjy uıymdarynyń múmkindigi shekteýli adamdarǵa bıyl 1 shildeden bastap engizilgen Qarjy uıymdary qyzmetteriniń qoljetimdilik jónindegi ulttyq standartyn eskere otyryp, qyzmetter kórsetýin qamtamasyz etý mindeti zańnamalyq deńgeıde engiziledi. Sondaı-aq qarjy uıymdaryna múmkindigi shekteýli adamdarmen jumys isteýdiń ishki tártibin bekitý mindeti júkteledi. Olar qarjy uıymdarynyń qyzmetterin alǵan kezde ózderine senim bildirilgen tulǵany taǵaıyndaý múmkindigine ıe bolady», – dep habarlady Mádına Ábilqasymova.

Jeńildikter kimderge beriledi

Agenttik basshysy merzimi ótken kredıtter boıynsha bereshekti retteý kezinde halyqtyń áleýmettik osal toptaryna jatatyn adamdardy, sondaı-aq tótenshe jaǵdaı saldarynan zardap shekken azamattardy qosymsha qorǵaý sharalarynyń kózdelgenin de atap ótti.

«Osy sanatqa jatatyn azamattar úshin bereshekti retteý kezinde qaryzdar men mıkrokredıtter boıynsha tólem merzimin mindetti túrde keminde 3 aı merzimge keıinge qaldyrý, sondaı-aq aı saıynǵy tólemdi 50 jáne odan da kóp paıyzǵa azaıtý kózdeledi. Qaryz alýshy-jeke tulǵalardyń quqyqtaryn qorǵaý úshin banktik qaryzdardy merziminen buryn ótegeni úshin aıypaqy alýǵa tyıym salynady. Mıkrokredıtti qaıtarmaǵany úshin aıypaqyny qospaǵanda, azamattardyń mıkrokredıtteri boıynsha kez kelgen aıypaqy óndirip alýǵa tyıym salynady.

Banktik qaryz nemese mıkrokredıt alý úshin jasalatyn saqtandyrý sharttary boıynsha saqtandyrý agenti komıssııasynyń shekti mólsheri  10% sheginde belgilenedi. Tutynýshylardy májbúrlep júktelgen qarjy ónimderinen qorǵaý maqsatynda, qarjy uıymdarynda qarjy ónimderin ázirleý men engizýdiń ishki rásimderiniń bolý talaby engiziledi», – dep habarlady QNRDA tóraǵasy.

Mádına Ábilqasymova tutynýshylardyń ýaqtyly keri baılanys alýy úshin qarjy uıymdarynyń klıentterdiń ótinishterin 15 jumys kúni ishinde qaraý merziminiń zańnamalyq turǵydan belgilenetinin atap ótti.

Zań jobasy Memleket basshysynyń «Ádiletti Qazaqstannyń ekonomıkalyq baǵdary» atty Qazaqstan halqyna Joldaýyn, «Ekonomıkany yryqtandyrý jónindegi sharalar týraly», «Memlekettik apparattyń qyzmetin bıýrokratııadan aryltý jónindegi sharalar týraly» Jarlyqtaryn iske asyrý úshin ázirlendi.