جاڭاارقا اۋدانىنىڭ اۋرۋحاناسىندا سۇمدىق جاعداي ورىن الدى

فوتو:

جاڭاارقا اۋدانىندا سوقىرىشەكپەن اۋرۋحاناعا تۇسكەن كوپبالالى انا گۇلنۇر جۋانىشباەۆا وپەراتسيادان كەيىن قايتىس بولدى, دەپ حابارلايدى  qandastar.kz

مارقۇمنىڭ تۋىستارى ونىڭ ولىمىنە مەديتسينا قىزمەتكەرلەرىنىڭ سالعىرتتىعى سەبەپ بولعانىن ايتىپ, بار دالەل-دايەكتەرىن جيناپ, كىنالىلەردى جازالاۋدى تالاپ ەتتى. گۇلنۇر جۋانىشباەۆا – ءتورت بالانىڭ اناسى, 20 جىل بويى پوليتسيا كاپيتانى رەتىندە قىزمەت ەتكەن قادىرلى ازامات ەدى. 2025 جىلدىڭ 20 ساۋىرىندە ول «جەدەل گانگرەنوزدى اپپەنديتسيت» دياگنوزىمەن جاڭاارقا اۋداندىق اۋرۋحاناسىنا ءتۇسىپ, وتا كەزىندە انافيلاكسيالىق شوكقا ۇشىراپ, كلينيكالىق ءولىم جاعدايىنا تاپ بولادى. دارىگەرلەر ونىڭ جۇرەك سوعىسىن قالپىنا كەلتىرگەنىمەن, 27 ساۋىرگە دەيىن كومادا جاتقان ناۋقاس اقىرىندا كوز جۇمدى.

مارقۇمنىڭ تۋىستارىنىڭ ايتۋىنشا, دارىگەرلەر ءولىمنىڭ شىنايى سەبەبىن جاسىرۋعا تىرىسقان. ولاردىڭ مالىمدەۋىنشە, گۇلنۇرعا قولدانىلعان ءدارى-دارمەكتەر ءتيىستى تەمپەراتۋرالىق رەجيمدە ساقتالماعان. اۋرۋحاناعا جەتكىزىلگەن پرەپاراتتار بىرنەشە كۇن بويى كىرەبەرىستەگى تامبۋردا جاتقان. فوتو جانە ۆيدەو دالەلدەردە تسەفوتاكسيم, تسيپروفلوكساتسين, ماننيتول, ناتري حلوريد سياقتى ماڭىزدى دارىلەردىڭ جەردە تۇرعانى كورسەتىلگەن. بۇل پرەپاراتتار كومادا جاتقان گۇلنۇرعا دا پايدالانىلعان, ال ول كەزدە ونىڭ جاعدايى مي ىسىگى مەن انافيلاكتيكالىق شوكتىڭ سالدارىنان وتە اۋىر بولعان.

سونىمەن قاتار, مارقۇمنىڭ تۋىستارى گۇلنۇر جاتقان پالاتانىڭ ءىشى ورتتەي ىستىق بولعانىن ەسكە الادى. وزدەرى تەرەزەلەردى اشىپ, بولمەنىڭ تەمپەراتۋراسىن 31°C-تان 27°C-قا دەيىن تومەندەتۋگە ءماجبۇر بولعان. وقيعاعا بايلانىستى جۋرناليستەر ۇلىتاۋ وبلىسىنىڭ دەنساۋلىق ساقتاۋ باسقارماسىنان تۇسىنىكتەمە سۇراتتى. باسقارما وكىلدەرى اۋرۋحانا ديرەكتورىنىڭ جۇمىسىنداعى كەمشىلىكتەر ءۇشىن قاتاڭ سوگىس العانىن, ال وتا جاساعان حيرۋرگ, رەانيماتولوگ جانە ناۋقاستى ەمدەگەن مەيىرگەرلەر سوت-مەديتسينالىق ساراپتامانىڭ ناتيجەلەرى شىققانشا قىزمەتتەن شەتتەتىلگەنىن حابارلادى. ساراپتاما قورىتىندىسى شىققان سوڭ, جاۋاپكەرشىلىك ماسەلەسى ناقتى شەشىلەتىن بولادى.

گۇلنۇر جۋانىشباەۆانىڭ جەرلەۋ راسىمىنە وبلىستىق دەنساۋلىق ساقتاۋ باسقارماسىنىڭ دارىگەرلەرى كەلىپ, وتباسىنا كوڭىل ايتىپ, باتا وقۋعا 200 مىڭ تەڭگە بەرگەن. مارقۇمنىڭ تۋىستارى بۇل جاعدايدىڭ تەك ءبىر وتباسىنىڭ قايعىسى ەمەس, بۇكىل ايماقتاعى دەنساۋلىق ساقتاۋ سالاسىنداعى جۇيەلى ماسەلەلەردى اشكەرەلەگەنىن ايتتى. «ادىلەت سالاسىندا قىزمەت ەتكەن ادامنىڭ ءوزى جاۋاپسىزدىقتان قازا تاپسا, وزگەلەردىڭ جاعدايى قانداي بولماق?» – دەپ ولار ادىلەتسىزدىككە نارازىلىق ءبىلدىردى.

قازىرگى تاڭدا جاڭاارقا اۋدانىنىڭ پوليتسيا ءبولىمى مەديتسينا قىزمەتكەرلەرىنىڭ ءوز مىندەتتەرىن تيىسىنشە ورىنداماۋ فاكتىسى بويىنشا قىلمىستىق ءىس قوزعادى. تەرگەۋ جۇمىستارى ۇلىتاۋ وبلىسى پوليتسيا دەپارتامەنتىنىڭ قاتاڭ باقىلاۋىندا جۇرگىزىلىپ جاتىر.